ҚР Бош вазир ўринбосари COVID-19 вакцинасини ишлаб чиқарадиган завод қурилиши билан танишди

KORDAI TÝMANI. Kazinform – ҚР Бош вазир ўринбосари Ерали Тоғжанов бошчилигидаги Ҳукумат делегацияси Қордай туманига ташриф буюрди, деб хабар беради Kazinform primeminister.kzга таяниб.

Бош вазир ўринбосари иш сафари давомида Гвардейский қишлоғидаги Биологик хавфсизлик илмий-тадқиқот институтида маҳаллий иммунитет дориларини ишлаб чиқарадиган завод қурилиши билан танишди. Завод Давлат раҳбари Қасим-Жомарт Тоқаевнинг топшириғига биноан қурилмоқда. Қурилиш-монтаж ишлари бу йил якунланади, барча коммунал хизматлар бажарилди. 145 киши ва 30 техника жалб қилинган. Завод келаси йилнинг биринчи чорагида иш бошлайди.

Бу ерда халқаро стандартларга мувофиқ иммунобиологик препаратлар, шу жумладан коронавирус инфекциясига, гриппга, сил, бруцеллез, тугунли дерматит ва бошқа юқумли касалликларга қарши вакциналар ишлаб чиқарилади. Ҳар йили 30-60 миллион дозада биологик препаратлар ишлаб чиқариш режалаштирилган.

Бош вазир ўринбосари институт ходимлари билан учрашди ва улар билан суҳбатлашди.

«Биофармацевтика заводи қурилиши ва маҳаллий коронавирусга қарши вакцинани ишлаб чиқиш Президентнинг алоҳида назоратида. Биз бугун барча долзарб масалаларни муҳокама қилиш ва ҳал қилиш учун келдик. Уй-жой ва логистика, иш ҳақини ошириш масалалари аллақачон ҳал қилинмоқда. Шу билан бирга, сизга катта масъулият юкланган. Бутун мамлакат сизга умид боғлайди», - деди Е.Тоғжанов қурувчиларга.

Жамбил вилояти ҳокими Бердибек Сапарбаев йирик завод қурилиши ҳудуд иқтисодиёти ривожланишига янги туртки беришини таъкидлади.

Кейин Ерали Тоғжанов институт ходимлари учун 60 хонадонли уй қурилиши билан танишди. Объект қурилиши август ойида бошланган ва келаси йил бошида фойдаланишга топширилади. Яна иккита уй қуриш режалаштирилган.

Институт иши билан танишгандан сўнг, Ерали Тоғжанов Қордай туманини ривожлантириш, шунингдек, тадқиқот институтининг долзарб масалаларини ҳал қилиш бўйича йиғилиш ўтказди.