Қозоғистоннинг Ўзбекистондаги Элчиси Марказий Осиё халқаро институти фаолияти билан танишди
Меҳмонга Марказий Осиё халқаро институти олдидаги мақсад ва вазифалар, Институтнинг маҳалллий ва хорижий, жумладан Қозоғистондаги шериклар билан ҳамкорликда амалга ошираётган тадбирлари ҳақида батафсил маълумотлар берилди.
Икки давлат раҳбарларининг кўп асрлик дўстлик, яхши қўшничилик ва ўзаро ишончни янада мустаҳкамлаш борасидаги қатъий сиёсий иродаси туфайли 2021 йилнинг 6 декабрида Ўзбекистон-Қозоғистон кўп қиррали алоқаларининг шонли йилномасида янги ёрқин саҳифа очилгани – Ўзбекистон ва Қозоғистон ўртасидаги кенг кўламли шерикчиликни иттифоқчилик муносабатлари даражасига олиб чиқиш тўғрисида қарор қабул қилингани чуқур мамнуният билан қайд этилди.
Учрашувда шунингдек, олий даражалардаги сўнгги ташрифлар чоғида эришилган келишувларни амалга оширишга кўмаклашиш, Марказий Осиёда минтақавий ўзаро ҳамкорлик, уни кенгайтириш ва мустаҳкамлаш, мамлакатларимизнинг етакчи таҳлилий марказларининг икки томонлама ва кўп томонлама таркибдаги ҳамкорлиги масалалари муҳокама қилинди.
Суҳбат якунида икки томонлама ва минтақавий шерикчилик масалалари ҳамда икки мамлакат илмий-академик алоқаларини фаоллаштириш бўйича мунтазам мулоқот қилиб туришга келишиб олинди.