Қозоғистоннинг ЕОИИ давлатлари билан ташқи савдо айланмаси 23 миллиард долларни ташкил этди — Президент
Бу ҳақда Қозоғистон раҳбари Қирғизистон пойтахтида бўлиб ўтган Олий Евроосиё иқтисодий кенгаши йиғилишида маълум қилди.
«Декабр ойида бўлиб ўтадиган анъанавий йиғилишда ҳамкорликда олиб борилган ишлар сарҳисоб қилинади ва келгуси йилдаги вазифаларни белгилаб оламиз. Ўтган йил жаҳон иқтисодиёти учун жуда оғир бўлди. Халқаро ҳамжамият пандемиядан қутулишидан олдин янги геосиёсий ва иқтисодий таҳдидларга дуч келди. Биз дунё бўйлаб савдони сезиларли даражада чеклайдиган турли хил тақиқлар, квоталар ва солиқлар жорий этилаётганини кўрмоқдамиз. Бунда Евроосиё иқтисодий иттифоқи доирасидаги фаол ҳамкорлигимиз жаҳон тенденцияларидан ижобий фарқ қилади ва бу ишонч уйғотади», — деди Давлат раҳбари.
Шунингдек, у Қозоғистоннинг Иттифоққа аъзо барча мамлакатлар билан ташқи савдоси ижобий динамикани кўрсатганини таъкидлади.
«Ташқи омилларга қарамай, Қозоғистоннинг Евроосиё иттифоқи мамлакатлари билан ташқи савдо айланмаси январ-октябр ойларида 7 фоизга ошиб, 23 миллиард долларга етди», — деди Қасим-Жомарт Тоқаев.
Муаллиф: Есимжан Нақтибай