Қозоғистоннинг аксарият ҳудудларида қурилиш ишлари ҳажми ошди

ASTANA. Kazinform - Қозоғистоннинг 17 вилоятида (Манғистау, Абай ва Қарағанди вилоятларини ҳисобга олмаганда) қурилиш ишлари ҳажмининг ўсиши кузатилмоқда, деб хабар беради Kazinform ҚР Индустрия ва инфратузилмаларни ривожлантириш вазирлигига таяниб.

Қурилиш халқ хўжалигида жадал ривожланаётган тизим шакллантирувчи тармоқлардан биридир. Унинг ривожланиши иқтисодиётнинг бошқа тармоқлари томирларига қон қуйиб юборишга қодир. Масалан, 2022 йилнинг 11 ойида республика бўйича қурилиш ишлари ҳажми 4,9 триллион тенгега етди. Умуман олганда, мамлакатимизда 47 мингдан ортиқ корхона қурилиш-монтаж ишларини олиб бориш учун лицензияга эга. Уларнинг 46 мингга яқини ҳозир фаолият юритмоқда.

Эслатиб ўтамиз, Президент Қасим-Жомарт Тоқаев топшириғига кўра шаҳарларни комплекс қуриш меъёрларининг услубий ҳужжати қабул қилинган бўлиб, у замонавий жамоат жойлари ва инфратузилмасини шакллантиришнинг содда ва кўргазмали воситасига айланади.

Стандартларни амалга ошириш учун ҳокимликлар кичик архитектура объектлари ва ободонлаштиришдан фойдаланган ҳолда шаҳарларнинг замонавий қиёфасини таъминлаш бўйича лойиҳа кодларини ишлаб чиқади. Шаҳарсозликни режалаштириш масалаларини тизимли ҳал қилиш масаласига келсак, ягона ахборот маконида мониторингнинг янги услуб ва механизмлари жорий этилаётганини алоҳида таъкидлаш лозим.

Шу билан бирга, шаҳарсозлик кадастри тизимининг фаолияти қурилишни самарали режалаштириш ва шаҳарсозлик йўналишида шаффофликни таъминлашнинг асосий воситаларидан бири бўлиши кутилмоқда.

Ҳудуд қурилишини комплекс рақамли бошқариш, шаҳарсозлик лойиҳаларини, муҳандислик-геодезия тадқиқотларини ҳисобга олиш, табиий монополиялар субъектларининг муҳандислик тармоқлари ва уларнинг қувватлари тўғрисидаги маълумотларини Шаҳар кадастр тизимига киритиш учун ягона шаҳарсозлик экспертизасини қонунчилик даражасида жорий этиш масаласи кўриб чиқилди.

Қурилишнинг смета қийматининг ошишига йўл қўймаслик мақсадида лойиҳа-смета ҳужжатларида нарх-наволарни қўллаш механизми олиб ташланди. Бу билан иш ва иншоотлар турлари бўйича кенг кўламли меъёрлардан фойдаланган ҳолда сметаларни ҳисоблашнинг замонавий усули жорий этилди. Ягона смета тўпламлари ишлаб чиқилди, бу смета ҳужжатларини тайёрлашнинг мураккаблигини камайтиради ва уларни баҳолаш жараёнини соддалаштиради.

Шунингдек, қурилиш сифати ва шаффофлигини таъминлаш устидан назоратни кучайтиришга қаратилган ягона қурилиш порталини ишлаб чиқиш ҳам ўз зиммасига олинганини таъкидлаш лозим. Ушбу чора-тадбирлар ягона рақамли муҳитда барча қурилиш иштирокчилари билан боғлиқ маълумотларни тўплашга ёрдам беради.

Ўтган йилнинг 11 ойи якунларига кўра, фуқароларнинг уй-жой муаммоларини ҳал этиш мақсадида 13 миллион квадрат метр уй-жой фойдаланишга топширилди. Шунингдек, 13 минг 800 ижара ва кредит хонадонлари қурилмоқда.

Шуни таъкидлаш керакки, уй-жой қурилиши циклини автоматлаштириш мақсадида ҚР ИИРВ қурилиш жараёнининг барча иштирокчилари учун E-Qurylys тизимини ишлаб чиқди. Энди E-Qurylys платформаси техник назорат ҳисоботларини электрон шаклда йиғишга ёрдам беради. Масалан, 2022 йилдан буён «Қозоғистон уй-жой компанияси» АЖнинг облигация кредитлари ҳисобидан E-Qurylys тизимида тезкор режимида 109 та автомобил йўллари ва 80 та уй-жой қурилиши лойиҳаси молиялаштирилди ва амалга оширилди.