22:32, 22 Июн 2022 | GMT +6
Қозоғистонда жисмоний тарбия ўқитувчиларига қўшимча тўловлар учун 21 млрд тенге маблағ ажратилади
NUR-SULTAN. Kazinform - Қозоғистон Республикаси Маданият ва спорт вазири Даурен Абаев мамлакатда оммавий спортни ривожлантириш ҳақида маълум қилди, дея хабар беради Кazinform мухбири.
«Савол ва танқидларни кутиб, шуни таъкидламоқчиманки, Арт Спорт оммавий спортни ривожлантиришнинг ягона механизми эмас. 41 та спорт-соғломлаштириш мажмуаси ишга туширилиб, шундан 32 таси вилоят марказлари ва қишлоқларда фойдаланишга топширилгани яхши самара берди. Шунингдек, қишлоқ жойларда спорт тадбирлари ва секцияларини ташкил этиш учун масъул бўлган 3064 та спорт инструкторлари жорий этилди»
, — деди Даурен Абаев.
Унга кўра, ёшларни спортга кенг жалб этиш мақсадида ўтган йили баскетбол, волейбол, футзал, қозоқ кураши, стол тенниси каби йўналишлар бўйича миллий мактаб ва талабалар лигалари ташкил этилган.
«Таълим тизимининг барча бўғинларида жисмоний тарбия ўқитувчиларининг дарсдан ташқари машғулотлари учун қўшимча ҳақ тўлаш жорий этилди. Бу тизим 30 мингдан ортиқ жисмоний тарбия ўқитувчиларини қамраб олди. Ушбу мақсадлар учун 2022-2024 йилларда ҳудудларга қўшимча 21 млрд тенге маблағ ажратилади. Агар умумий натижа ҳақида гапирадиган бўлсак, бугунги кунда болаларнинг қўшимча спорт секциялари ва тўгараклари билан қамраб олиниши 73 фоизни ташкил этади»
, — деди вазир.
«Ўсмирлар спорт мактабида аҳоли жон бошига молиялаштириш тизими ва таълим муассасалари қошидаги секциялардан ташқари яна 386 минг нафар бола таҳсил олмоқда. 2022 йилда жами молиялаштириш ҳажми 123,7 млрд тенгени ташкил этади»
, — дея қўшимча қилди Маданият ва спорт вазири.
Муаллиф: Азамат Сиздиқбаев