Қозоғистонда шакар ишлаб чиқаришни ривожлантиришнинг комплекс режаси ишлаб чиқилади

NUR-SULTAN. Kazinform – Давлат раҳбарининг топшириқларини бажариш бўйича ҚР Қишлоқ хўжалиги вазирлиги бир қатор тизимли ва кечиктириб бўлмайдиган чора-тадбирларни амалга оширмоқда. Бу ҳақда ҚР Қишлоқ хўжалиги вазири Ербол Қарашўкеев маълум қилди, дея хабар беради Kazinform мухбири.

«Импорт ўрнини босиш масаласи ҳар томонлама ҳал қилинади. Умуман олганда, 2022 йил охиригача агросаноат мажмуасини ривожлантириш бўйича 295 миллиард тенгега 237 та инвестиция лойиҳасини, жумладан, импорт қилинадиган позициялар бўйича 6 турдаги 128,5 миллиард тенгега 81 та лойиҳани амалга ошириш режалаштирилган. Шу мақсадда мазкур лойиҳаларга соддалаштирилган кредитлар, субсидиялар, ер ресурслари ва инфратузилма тақдим этилади», - деди вазир.

Унинг таъкидлашича, мамлакатни шакар билан таъминлаш мақсадида янги суғориладиган ерларни ўзлаштириш, сувни тежайдиган суғориш технологияларини жорий этиш, уруғчиликни ривожлантириш, шунингдек, мавжуд қанд лавлагини қайта ишлаш корхоналарини техник ва технологик қайта жиҳозлаш, шакар заводларини қуриш ва модернизация қилиш ҳисобига хомашё базасини кўпайтиришни назарда тутувчи шакар саноатини ривожлантиришнинг комплекс режаси ишлаб чиқилади. Шунга кўра, шакар саноатини давлат томонидан тартибга солиш ва қўллаб-қувватлаш чоралари кучайтирилади.

«Оқ шакар импорти ва қуруқ шакар хомашёсини қайта ишлаш ҳажми оширилади. Давлат раҳбарининг топшириғига биноан ички бозорда нархларни барқарорлаштириш мақсадида Савдо ва интеграция вазирлиги билан ҳамкорликда «айланма схемаси» доирасида, жумладан, ички бозорда нархларни барқарорлаштириш мақсадида форвард шартномалари механизми, қишлоқ хўжалиги маҳсулотлари ишлаб чиқарувчиларни молиялаштиришнинг устувор масаласи ишлаб чиқилади», - деди Е. Қарашўкеев.

Муаллиф: Айжан Серикжанқизи