Қозоғистонда референдум ўтказиш нима учун зарурлиги ошкора этилди
30 Апрель 13:07

Қозоғистонда референдум ўтказиш нима учун зарурлиги ошкора этилди

NUR-SULTAN. Kazinform – Қозоғистонда референдум охирги марта 1995 йилда амалдаги Конституция қабул қилинганда ўтказилган. ҚР Давлат котиби Ерлан Қариннинг айтишича, давлат моделини тизимли трансформация қилиш учун мамлакат ушбу механизмга яна бир бор мурожаат қилади, деб хабар беради Kazinform.

«Мамлакат Конституциясига киритилган аввалги тўртта ўзгартиришнинг барчаси ҳар доим Қозоғистон Республикаси парламентида овоз бериш орқали амалга оширилган. Конституциявий ислоҳот биринчи марта тўғридан-тўғри халқ овози орқали амалга оширилади, бу унинг умуммиллий хусусиятини кўрсатади», — деди Е.Қарин.

Унинг сўзларига кўра, бўлажак конституциявий ислоҳот ҳокимият тармоқлари ўртасидаги муносабатлар мувозанатини оптималлаштириш, халқнинг мамлакатни бошқаришдаги иштирокини кенгайтириш, фуқароларнинг конституциявий ҳуқуқларини ҳимоя қилишни кучайтириш имконини беради. Бу давлат моделининг тизимли трансформация қилинишини билдиради.

«Шунинг учун, эски моделдан бутунлай кетиб, сиёсий тизимни қайта ишга тушириш учун референдум зарур», — дея хулоса қилди Е.Қарин Telegram каналида.

Эслатиб ўтамиз, кеча Қозоғистон Президенти Қасим-Жомарт Тоқаев Конституцияга ўзгартиришлар киритиш бўйича республика референдумини ўтказишни таклиф қилган эди.

Шунингдек, референдумда Қозоғистон Конституциясининг 33 та моддасига ўзгартиришлар киритилиши маълум қилинди.


Янгиликлар

Архив