Қозоғистонда озиқ-овқат маҳсулотлари ишлаб чиқаришга йўналтирилган инвестициялар ҳажми ошди
«2021 йилнинг 11 ойи якунлари бўйича агросаноат мажмуасининг асосий капиталига йўналтирилган инвестициялар умумий ҳажми 659,7 миллиард тенгени ташкил этиб, ўтган йилнинг шу даврига нисбатан 40,5 фоизга ошган. Озиқ-овқат маҳсулотлари ишлаб чиқаришнинг асосий капиталига йўналтирилган инвестициялар ҳажми 91,2 миллиард тенгени ташкил этди, бу ўтган йилга нисбатан 2,6 фоизга кўпдир», — деди Е.Қарашукеев Ҳукумат йиғилишида.
Қишлоқ хўжалиги вазирлиги маҳаллий ижро ҳокимияти органлари билан биргаликда 2021-2025 йилларга мўлжалланган агросаноат мажмуасида инвестиция лойиҳаларини амалга ошириш бўйича «Йўл хариталари»ни ишлаб чиқди ва тасдиқлади. «Йўл хариталари»га кўра, умумий қиймати 4,4 триллион тенге бўлган 934 та инвестиция лойиҳасидан иборат жамғарма яратилди.
– Мазкур лойиҳаларнинг асосий йўналишлари белгилаб олинди. Гўшт тармоғида (бўрдоқилаш майдонлари, репродукторлар, сўйиш цехлари, гўштни қайта ишлаш корхоналари) умумий қиймати қарийб 1 триллион тенге бўлган 301 та лойиҳани амалга ошириш режалаштирилган. Иссиқхоналарда умумий қиймати 1 триллион тенге бўлган 67 та лойиҳани амалга ошириш режалаштирилган. Сут чорвачилигида умумий қиймати 452 миллиард тенге бўлган 186 лойиҳани амалга ошириш кўзда тутилган. 373 миллиард тенгега 47 та паррандачилик фабрикаси қуриш режада бор», — деди вазир.
Бундан ташқари, ўсимлик маҳсулотларини қайта ишлаш бўйича 300 миллиард тенгелик 73 та лойиҳани амалга ошириш режалаштирилган.
«5 йил ичида шакар етказиб бериш 80 фоизга оширилади, умумий қиймати 228 миллиард тенге бўлган лойиҳаларни амалга ошириш режалаштирилган. Интенсив боғлар барпо этишда умумий қиймати 100 миллиард тенге бўлган 32 та лойиҳани амалга ошириш режалаштирилган. Бошқа соҳаларда ирригация, уруғчилик, озиқ-овқат маҳсулотлари етиштириш ва бошқа йўналишлар бўйича умумий қиймати 834 миллиард тенге бўлган 225 та лойиҳани амалга ошириш кўзда тутилган», — деди у.
Муаллиф: Руслан Ғаббасов