Қозоғистонда коронавирус юқтириш ҳоллари 4 кундан бери камаймоқда
coronavirus2020.kz сайтининг маълум қилишича, кеча, 31 июль куни сутка давомида 1289 одамдан коронавирус инфекцияси аниқланган бўлиб, шундан 581 нафари клиник аломатлари йўқ ташувчи сифатида рўйхатга олинган.
Таъкидлаш жоизки, қаторасига тўртинчи кун Қозоғистонда янги ҳолатлар аниқланиш суръати пасайиб бормоқда. Хусусан, 28 июль куни 1544 нафар одам ушбу инфекцияга чалинган бўлса, 29 июльда 1472 та ҳолат қайд этилган, 30 июль куни эса бу кўрсатгич 1414 тагача пасайган.
Эслатиб ўтамиз, 28 июль куни ҚР Бош вазири Асқар Мамин мамлакатдаги эпидемиологик вазият ва коронавирус инфекциясига қарши кураш чораларига бағишланган Ҳукумат йиғилишида 5 июль куни жорий қилинган карантин чора-тадбирлари натижа бергани ва ушбу даврда эпидемиологик вазият барқарорлашиб, тиббий ташкилотларнинг иш юкламаси сезиларли даражада камайганини маълум қилганди.
Ўз ўрнида ҚР Соғлиқни сақлаш вазири Алексей Цой 2 августда карантин даври тугаса ҳам, кўплаб чекловчи чоралар кучда қолишини маълум қилди.