Қозоғистонда ички бозор учун ғалла етарли

NUR-SULTAN. Kazinform – Қозоғистонда ички бозор барқарорлигини таъминлаш учун етарли миқдорда дон бор. Бу ҳақда ҚР Қишлоқ хўжалиги вазирлиги маълум қилди, дея хабар беради Kazinform.

«Асосий буғдой етиштирувчи давлатлар Россия ва Украинадаги геосиёсий вазият туфайли жорий йилда жаҳон бозорида буғдойга талаб ошди. Бу омил буғдой нархига ҳам таъсир қилади. Шу муносабат билан 1 мартдан ички бозорда буғдой нархи бир тонна учун 116 минг тенгедан 163 минг тенгега кўтарилди. Сариағаш бекатида экспорт нархи бир тонна учун 270 АҚШ долларидан 410 АҚШ долларига кўтарилди. Шу билан бирга, «Озиқ-овқат корпорацияси НК» АЖ заҳираларида етарли миқдорда ғалла бор, эҳтиёж туғилса, ички бозорни барқарорлаштириш учун жўнатиш мумкин», — дейилади вазирликнинг Kazinform сўровига берган жавобида.

Айни пайтда «Озиқ-овқат корпорацияси» МК томонидан ун ишлаб чиқарувчи корхоналарга 275 минг тонна буғдой жўнатиш ишлари амалга оширилмоқда.

«Давлат субсидиялари ҳисобига буғдой 90 минг тенгедан сотилмоқда, бозорда эса ўртача 160 минг тенге. Шу нуқтаи назардан, ҳудудлар «ижтимоий» нонни амалдаги нархларда етказиб бериши мумкин», — дейилади вазирлик хабарида.