Қозоғистонда гриппга қарши 2,3 миллион доза вакцина харид қилинди

ASTANA. Кazinform - Жорий йилда мамлакатда 2,3 миллион доза гриппга қарши вакцина сотиб олинди. У аҳолининг 12 фоизини қамраб олади. Бу ҳақда Соғлиқни сақлаш вазири ўринбосари Айжан Есмағамбетова маълум қилди, дея хабар беради Кazinform мухбири.

«Ҳар йили грипп вирусининг тарқалиши ноябр ойида бошланиб, апрел ойининг ўрталаригача давом этади. Ўтган йили республика бўйлаб 3,9 миллион киши ЎРВИ билан касалланган. 2019-2020 йилларнинг эпидемиологик мавсумига нисбатан беморлар сони 1,3 бараварга ошган. Беморларнинг 80 фоизи болалар ва ўсмирлардир. Ўтган мавсумда А (H3N2) ва B грипп вирусининг 2 штамми айланиб юрган. Жами 915 та инфекция юқтириш ҳолати аниқланди», — деди Айжан Есмағамбетова Марказий коммуникациялар хизмати майдонида бўлиб ўтган матбуот анжуманида.

Шунингдек, вазир ўринбосари гриппдан бошқа вируслар ҳам борлигини эслатди.

«Ўтган йили 10 мингдан ортиқ намуналар ўрганилди. Унинг давомида риновирус, РС вируси, аденовирус инфекцияси, парагрипп, метапневмовирус ва бокавирус аниқланган. Касалликнинг олдини олишнинг энг самарали усули бу эмлашдир. Вакциналар хавфсиз, самарали ва 60 йилдан ортиқ вақт давомида қўлланилган. Жорий йилда Россияда ишлаб чиқарилган 2,3 миллион доза «Гриппол+» вакцинаси харид қилинди. Унда келгуси мавсум учун грипп штаммлари мавжуд. Бу республика аҳолисининг 12 фоизини қамраб олиш имконини беради», - дейди у.

Аввалроқ Айжан Есмағамбетова мамлакатда гриппга қарши эмлаш 3 октябрдан бошланишини айтган эди. Бундан ташқари, кимлар бепул эмланишига аниқлик киритилди.

Муаллиф: Даулет Изтилеу