Қозоғистонда фермерларга меҳмонхона ва глэмпинг қуришга рухсат бериш таклиф қилинмоқда

BURABAI. Kazinform – ҚР Маданият ва спорт ишлари вазири ўринбосари Ержан Еркинбаев туризмнинг глэмпинг (гламур+кэмпинг) йўналишини ривожлантириш ҳақида гапирди, деб хабар бермоқда Kazinform мухбири.

«Қишлоқ жойларда лагер ва меҳмонхоналар ташкил этишда қонуний чекловлар мавжуд. Статистик маълумотларга кўра, мамлакатимизда 219 минг деҳкон ва фермер хўжаликлари мавжуд. Шу муносабат билан фермерларга қишлоқ хўжалиги ерларининг 10 фоизидан кўп бўлмаган миқдорда туристларга хизмат кўрсатиш учун меҳмонхоналар ва глэмпинг майдончалари қуришга рухсат бериш таклифи билан чиқдик», - деди Ержан Еркинбаев.

Вазирликнинг ҳисоб-китобларига кўра, фермер хўжаликларининг камида 1 фоизи сайёҳларни жойлаштириш билан шуғулланса ва камида 2 киши иш билан таъминланса, ҳар йили 6,6 минг киши иш билан таъминланарди.

Ўтган йили Қозоғистоннинг 8 та ҳудудида (Алмати, Ақмола, Ақтўбе, Манғистау, Павлодар, Туркистон вилоятлари, Алмати, Чимкент шаҳарлари) 28 та глэмпинг мажмуаси очилди. Яқин орада шундай мажмуалар Қарқарали туманидаги «Алтин Емел» миллий боғида ҳам пайдо бўлади. Бундай иншоотларни Ақтўбе, Жамбил, Шимолий Қозоғистон вилоятларида ҳам қуриш режалаштирилган.

«Масалан, Франция, Германия, Австрия, Аргентина, Беларусь каби мамлакатлардаги сайёҳлар орасида агротуризм объектлари жуда машҳур», – деди вазир ўринбосари.

Муаллиф: Айжан Серикжанқизи