Қозоғистонда энг яхши ўқитувчилар 3 миллион тенге ва кўкрак нишони билан тақдирланади
Таълим-маориф вазирлигидан маълум қилишларича, «Энг яхши ўқитувчи-2022» танловида иштирок этиш учун аризалар қабул қилиш давом этмоқда. Биринчи ҳафтада мамлакатнинг турли ҳудудларидан 2,6 минг нафардан ортиқ ўқитувчи ва педагоглар ўз аризаларини жўнатган.
Ҳужжатларни қабул қилиш 12 сентябрдан бошланди ва 2022 йил 22 сентябргача давом этади. Танловда мактабгача таълим, ўрта, техник ва касб-ҳунар таълими ташкилотлари тарбиячилари иштирок этишлари мумкин. Ғолиблар 3 миллион тенгедан мукофот олади. Ўтган йили мамлакатнинг турли вилоятларидан келган 64 нафар ўқитувчининг ҳар бири 3 миллион тенгедан олган.
«Бу йил танловни рақамлаштириш туфайли танловнинг ҳар уч босқичида нечта ўқитувчи иштирок этишини кузатишимиз мумкин. Биринчи ҳафтада 2630 нафар ўқитувчи ва педагог https://teachercontest.iac.kz/ веб-порталида рўйхатдан ўтди. Бу йил анкетани тўлдиргандан сўнг танловда иштирок этаётган ҳар бир ўқитувчи танловнинг кейинги динамикасини, яъни иштирокчилар қайси босқичда экани, уларга экспертлар томонидан қандай балл қўйилганини кузатиши мумкин», — деди Таълим-маориф вазирлигининг Мактабгача ва ўрта таълим қўмитаси раиси Гулмира Каримова.
«Энг яхши ўқитувчи» унвони ғолиблари нафақат 3 миллион тенге пул мукофоти, балки кўкрак нишонлари билан ҳам тақдирланади.
Танлов қоидалари бўйича қўшимча маълумотни Таълим-маориф вазирлиги веб-сайтидан олиш мумкин.