Қозоғистонда дарсликларнинг 79 фоизи рақамлаштирилди

ASTANA. Kazinform – Қозоғистонда мактаб дарсликларининг 79 фоизи рақамлаштирилди. Бу ҳақда Ҳукумат йиғилишида ҚР Таълим-маориф вазири Ғани Бейсембаев маълум қилди, дея хабар беради Kazinform мухбири.

«Давлатимиз раҳбарининг ўқув жараёнини рақамлаштириш доирасида фанларни ўқитишнинг инновацион усулларини жорий этиш, зарур ўқув материалларини рақамли форматга ўтказиш, ўқитувчиларга рақамли ўқув материалларидан самарали фойдаланишни, инновацион усуллардан фойдаланишни ўргатиш, рақамли ўқув материалларини кенгайтириш, мактаб ичидаги ва миллий ташқи баҳолашни рақамли форматга ўтказиш, шунингдек, мактабларни техник жиҳозлар ва юқори тезликдаги интернет билан таъминлаш вазифаси ҳам амалга оширилмоқда», - деди вазир.

Унинг таъкидлашича, бунинг учун зарур бўлган талаб ва қоидалар вазирликнинг 6 та норматив-ҳуқуқий ҳужжатида аниқ белгиланган. Мазкур қонунларга мувофиқ, бугунги кунда таълим тизимини рақамлаштириш комплекс ва тизимли равишда амалга оширилмоқда.

«Ўқув жараёнини бошқаришни рақамлаштириш мақсадида республика бўйича 7 минг мактабда электрон журнал ва кундалик юритиш, баҳолаш, уйга вазифа бериш, режа тузиш, масофавий ўқитиш каби асосий хизматларни ўз ичига олган таълим платформалари жорий этилди. Бундан ташқари, ушбу платформаларнинг ўқувчилар ва ўқитувчилар учун мобил иловалар, таҳлилий панеллар, мактаб менюси ва малака ошириш онлайн курслари каби қўшимча хизматлари йўлга қўйилди. Айни пайтда дарсликларнинг 79 фоизи рақамлаштирилиб, давлат экспертизасидан ўтиб, дарсликлар рўйхатига киритилган», - деди у.

Муаллиф: Марлан Жиембай