Қозоғистонда бюджет даромадлари 2022 йилда 10,2 триллион тенгега ошади

NUR-SULTAN. Kazinform - Қозоғистон Республикаси Молия вазири ўринбосари Татьяна Савельева 2022 йилда бюджет даромадлари ўсиши бўйича ўз прогнозини маълум қилди, дея хабар беради Kazinform мухбири.

«Иқтисодиётни ривожлантириш учун кутилаётган ташқи шароитларни ҳисобга олган ҳолда, ижтимоий-иқтисодий ривожланишнинг аниқланган прогнози, шунингдек, божхона ва солиқ маъмуриятчилигини такомиллаштириш бўйича кўрилаётган чора-тадбирларга кўра жорий йилда тушумлар 9,2 триллион тенгедан 10,2 триллион тенгегача кўтарилади», - деди Татьяна Савельева «2022-2024 йилларга мўлжалланган республика бюджети тўғрисида»ги қонунларга ўзгартиришлар киритиш ва Миллий жамғармадан ушбу йиллар учун кафолатланган трансферт тўғрисидаги қонун лойиҳалари тақдимотида.

Унинг сўзларига кўра, Давлат раҳбарининг топшириғига асосан жорий йилда бензин ва дизел ёқилғиси учун акциз ставкаларини оширишни назарда тутувчи ўзгартиришлар қабул қилинган.

«Ушбу чора-тадбирларни амалга оширишдан тушган 161,8 миллиард тенге миқдоридаги қўшимча маблағ республика бюджетига учта ҳудуддан – Павлодар, Атирау вилоятлари ва Чимкент шаҳридан тушади. Шундай қилиб, бюджетнинг ўз даромадлари 1,1 триллион тенгега ошади. Шу билан бирга, белгиланган вазифаларни амалга ошириш учун 2,7 триллион тенге миқдорида маблағ талаб этилади, шу муносабат билан Президент билан келишилган ҳолда 1,6 триллион тенге миқдорида кафолатланган трансфертни қўшимча равишда жалб этиш таклиф этилмоқда», — деди вазир ўринбосари.

«Умуман олганда, жорий йилда Миллий жамғармадан кафолатланган трансферт ҳажми 4 трлн тенге. Шу билан бирга, йил якунлари бўйича Миллий жамғарманинг тушумлари ва харажатлари салдоси ижобий бўлади», — дея қўшимча қилди Т.Савельева.

Муаллиф: Азамат Сиздиқбаев