Қозоғистонда 14,9 мингдан ортиқ чет эл фуқароси меҳнат қилади

ASTANA. Kazinform – 2022 йил 1 ноябр ҳолатига кўра, Қозоғистонда маҳаллий ижро ҳокимияти органлари рухсати билан 14 957 нафар чет эл фуқароси ишламоқда, деб хабар беради Қозоғистон Республикаси Меҳнат ва аҳолини ижтимоий ҳимоя қилиш вазирлиги матбуот хизмати.

Хорижий ишчи кучини жалб қилиш учун берилган рухсатномалар қаторига қуйидагилар киради: раҳбарлар ва уларнинг ўринбосарлари учун 576 та рухсатнома (биринчи тоифа), таркибий бўлинма раҳбарлари учун 3029 та рухсатнома (иккинчи тоифа). Ишга жалб этилган хорижий ишчи кучининг асосий қисми учинчи (мутахассислар) ва тўртинчи (малакали ишчилар) тоифаларига тегишли - мос равишда 7715 ва 856 киши. Шунингдек, 1241 нафари мавсумий ишларга, 1540 нафари корпоратив трансферга жалб этилган.

Айни пайтда Қозоғистонда хорижлик ишчи кучидан фойдаланаётган 1719 иш берувчи мавжуд. Уларда Қозоғистоннинг 399 мингдан ортиқ фуқароси ишлайди, бу умумий ходимлар сонининг 96 фоизини ташкил этади.

Иқтисодий фаолият соҳасида энг кўп меҳнат қилаётганлар қурилиш соҳасида – 5910 киши (40%); кончилик ва карьерларни қазиб олиш - 1419 киши (10%); қишлоқ, ўрмон ва балиқ хўжалиги – 1146 киши (8%); касбий, илмий ва техник хизмат кўрсатиш - 1081 киши (8%); ишлаб чиқариш саноати - 995 киши (7%).

Меҳнат муҳожирлари келган асосий мамлакатлар: Хитой – 3500 киши, Ҳиндистон – 1731 киши, Туркия – 1642 киши, Ўзбекистон – 1344 киши, Буюк Британия – 1112 киши.

Ички меҳнат бозорини ҳимоя қилиш мақсадида Қозоғистон Республикаси Меҳнат ва аҳолини ижтимоий ҳимоя қилиш вазирлиги ҳар йили республикага чет эллик мутахассисларни жалб қилиш учун квоталарни белгилайди ва ажратади. Жорий йилнинг январ ойида Меҳнат вазирлиги томонидан чет эл ишчи кучини жалб қилиш квотаси аввал режалаштирилган 28 352 бирликдан 21 097 бирликка, яъни 7 255 бирликка (25 фоиз) камайтирилди.