Қозоғистон ва Ўзбекистон томонидан халқаро саноат кооперацияси маркази ташкил этилади

ТASHKENT. Кazinform - Қозоғистон ва Ўзбекистон чегарасида Марказий Осиё халқаро саноат кооперацияси маркази ташкил этилади. Бу ҳақда бугун Ўзбекистон-Қозоғистон минтақалараро бизнес-форуми доирасида Қозоғистон Республикаси Бош вазири ўринбосари – Савдо ва интеграция вазири Серик Жуманғарин маълум қилди, дея хабар беради Kazinform мухбири.

«Саноат кооперацияси ва учинчи давлатлар бозорларига экспорт қилиш учун қўшма маҳсулот яратиш йўлидаги муҳим қадам Қозоғистон ва Ўзбекистон чегарасида Марказий Осиё халқаро саноат кооперацияси маркази лойиҳасини жадал амалга оширишдир. Марказ нафақат самарали саноат кооперацияси намунаси, балки фаол ривожланаётган Марказий Осиёнинг «Шимол-Жануб» иқтисодий коридори учун асосий платформага айланади», — деди Серик Жуманғарин.

Маърузачи мамлакатлар иқтисодиётига тўғридан-тўғри хорижий инвестицияларни жалб этиш алоҳида ўрин тутишини таъкидлади. Унга кўра, 2005 йилдан 2022 йилнинг иккинчи чорагигача Ўзбекистондан Қозоғистонга ялпи тўғридан-тўғри хорижий инвестициялар оқими 23 миллион долларни ташкил этган бўлса, Қозоғистоннинг Ўзбекистон иқтисодиётига киритган сармояси шу даврда 560 миллион долларни ташкил этган.

«Марказий Осиё минтақаси халқаро капитални жалб қилиш масалаларида бирлашган фронт сифатида ҳаракат қилиши керак. Қозоғистонда аллақачон барча зарур инфратузилма яратилган, жумладан, Астана халқаро молия маркази сайти, сармоявий имтиёзлар. Биз инвесторлар учун минтақамизга кириш эшиги бўлишга тайёрмиз», - деди Серик Жуманғарин.

Муаллиф: Мадибек Жанибеков