Қозоғистон ва Ўзбекистон Бош вазир ўринбосарлари қўшма лойиҳаларнинг амалга оширилишини кўздан кечирди

ASTANА. Кazinform – Қозоғистон Республикаси Бош вазири ўринбосари – Савдо ва интеграция вазири Серик Жуманғарин ва Ўзбекистон Республикаси Бош вазири ўринбосари Жамшид Хўжаев Қозоғистон Президентининг декабрь ойида Ўзбекистонга ташрифи чоғида имзоланган сармоявий битимлар ва савдо шартномаларининг бажарилишини муҳокама қилди, деб хабар беради primeminister.kz.

Томонлар қатор лойиҳалар амалга оширилаётганидан мамнун эканликларини қайд этдилар. Масалан, Тошкент вилоятида мультимодаль логистика марказини қуриш бўйича техник-иқтисодий тадқиқотларни ишлаб чиқиш бўйича шартнома имзоланган бўлиб, март ойи бошида лойиҳа-смета ҳужжатларини ишлаб чиқиш бўйича шартнома имзолаш режалаштирилган. Лойиҳани 2026 йилгача амалга оширишнинг биринчи босқичи 70 миллион долларлик инвестицияларни жалб қилишни назарда тутади.

Яна бир истиқболли қўшма лойиҳа Қозоғистон ва Ўзбекистон чегарасида «Марказий Осиё» халқаро саноат кооперацияси марказини ташкил этишдир. Январь ойи охирида томонлар ХСК марказининг жойлашишини олдиндан келишиб оладилар ва иншоотни «Атамекен» (Қозоғистон) ва «Гулистон» (Ўзбекистон) халқаро назорат-ўтказиш пунктлари ҳудудида қуриш кўзда тутилган. Тез орада келишувларни тасдиқлаш режалаштирилган.

«Биз инвестиция шартномасини имзолашни тезлаштирамиз. Лойиҳага катта қизиқиш кутилмоқда», — деди Серик Жуманғарин кооперация лойиҳаларни амалга ошириш мониторинги ва импорт ўрнини босиш бўйича тизимли ишлар бўйича ишчи гуруҳининг биринчи йиғилиши иштирокчиларига.

Қозоғистон Республикаси Бош вазири ўринбосари ўзбекистонлик ҳамкорларига Қирғизистон билан чегарада шундай савдо-логистика маркази қурилиши ҳақида гапириб берди ва Ўзбекистон инвесторлари ва ишбилармонларини ушбу лойиҳада иштирок этишга таклиф қилди.

Ўз навбатида, Ўзбекистон Бош вазирининг ўринбосари Жамшид Хўжаев уни биргаликда амалга оширишдан манфаатдорлигини билдирди.

Шунингдек, йиғилишда томонлар ўзаро алмаштириладиган маҳсулотларни мунтазам етказиб беришни ташкил этиш учун қўшма ташқи савдо компаниясини ташкил этиш концепциясини маъқуллади. Ишчи гуруҳ иштирокчилари энергетика, транспорт, қишлоқ хўжалиги, электротехника саноати ва машинасозлик, инфратузилмалар қурилиши, фармацевтика, кимё каби соҳаларда ҳамкорлик ва инвестиция лойиҳаларини амалга ошириш масалаларини кўриб чиқдилар. Амалга ошириш жараёнида уларнинг баъзилари ўзгартиришлар киритишни талаб қилади.

Кооперация лойиҳаларни амалга ошириш ва импорт ўрнини босиш бўйича тизимли ишлар мониторинги бўйича Қозоғистон-Ўзбекистон ишчи гуруҳининг навбатдаги йиғилиши 2023 йил март ойида Чимкент шаҳрида бўлиб ўтади.