Қозоғистон ва Тожикистон Президентлари тор доирада музокара ўтказди
Қасим-Жомарт Тоқаев Эмомали Раҳмонга ҳурмат бажо келтирар экан, Тожикистон Қозоғистоннинг ишончли стратегик ҳамкори, шунингдек, қардош ва яқин давлат эканини таъкидлади.
«Бизни қадим замонлардан бери умумий тарих, маданий ва маънавий қадриятлар чамбарчас боғлаб келган. Икки давлат ўртасида дипломатик муносабатлар ўрнатилганининг 30 йиллиги муносабати билан биз Иттифоқчилик ҳамкорлиги тўғрисидаги декларацияни имзолаяпмиз. Бу рамзий маънога эга. Ушбу ҳужжат жуда муҳим ва келажакка қаратилган. Бу давлатларимизнинг миллий манфаатларига ҳам тўлиқ жавоб беради. Бу йўналишда орамизда ҳеч қандай шубҳа йўқ. Қозоғистон ва Тожикистон ўртасида савдо-иқтисодий ҳамкорлик фаол ривожланмоқда. Кўп йиллар давомида Қозоғистон - Тожикистоннинг иккинчи йирик савдо шериги бўлиб келган. Биргина ўтган йилнинг ўзида ўзаро товар айирбошлаш ҳажми 18,5 фоизга ошиб, 1,4 миллиард долларга етди. Ҳозирги шароитда бу яхши натижа. Саноат, қишлоқ хўжалиги, транспорт ва бошқа соҳаларда бир қатор иқтисодий лойиҳалар амалга оширилиш босқичида. Ташрифингиз доирасида иқтисодиётнинг турли тармоқларида ҳамкорликни янада кенгайтиришга қаратилган муҳим янги келишувлар тўплами имзоланади», - деди Қозоғистон Президенти.
Қ.Тоқаев кеча икки давлат ўртасидаги ҳамкорлик истиқболлари юзасидан норасмий ва ўзаро ишончга асосланган фикр алмашилганини таъкидлади.
«Энг муҳими, товар айирбошлаш ҳажмини икки миллиард долларга етказиш имконияти мавжуд. Тадбиркорлар ўртасида 1,8 миллиард долларлик шартномалар имзоланганидан мамнунмиз. Бу - жуда яхши натижа. Умид қиламанки, икки давлат ҳукуматлари ушбу шартномалар ижросини диққат билан кузатиб боради. Бизнинг мустаҳкам ва узоқ муддатли муносабатларимизнинг мустаҳкам асосини яқин маданий-гуманитар алоқалар ташкил этади. Ўтган йили Душанбеда Қозоғистон киноси кунлари муваффақиятли ўтказилди. Жорий йилда мамлакатимизда Тожикистон маданияти кунларини ўтказиш режалаштирилган. Биз ушбу тадбирга пухта тайёргарлик кўришимиз керак», - деди Давлат раҳбари.