Қозоғистон ва Саудия Арабистони тикланувчи энергия қўшма лойиҳаларини амалга ошириши мумкин

JEDDAH. Kazinform - Жидда шаҳрида Қозоғистон Республикаси Президенти Қасим-Жомарт Тоқаевнинг Саудия Арабистонига расмий ташрифи доирасида «Қозоғистон – Саудия Арабистони» сармоявий давра суҳбати бўлиб ўтди, деб хабар беради Kazinform.

Тадбирда Байтерек холдинги раҳбари Қанат Шарлапаев Қозоғистон Президенти Қасим-Жомарт Тоқаевнинг Саудия Арабистонига илк ташрифи икки томонлама ҳамкорлик ривожига янги суръат бағишлаши, шунингдек, савдо-иқтисодий алоқаларни, Саудия Арабистони ва Қозоғистон ўртасидаги сармоявий ҳамкорликни янада мустаҳкамлаш йўлидаги муҳим қадам бўлишига ишонч билдирди.

Раис холдинг фаолияти билан таништириб, унинг Қозоғистон иқтисодиётидаги ўрнини таъкидлаб, «Байтерек» Қозоғистон Ҳукуматининг асосий ривожланиш институти ва асосий молиявий агенти сифатида мамлакат иқтисодиётини муҳим устувор тармоқларда қўллаб-қувватлаётганини таъкидлади.

Унга кўра, холдингнинг умумий активлари 3,7 миллиард доллар капитал билан 22 миллиард долларни ташкил этади. Холдинг ва унинг таркибига кирувчи саккизта портфел компаниясининг стратегик йўналишлари саноат-инновацион ривожланиш, маҳаллий маҳсулотлар экспортини рағбатлантириш, кичик ва ўрта бизнесни ривожлантириш, агросаноат комплекси ва уй-жой қурилиш индустриясини ривожлантиришдан иборат.

Қанат Шарлапаев холдинг томонидан «яшил» молиялаштиришни ривожлантиришга катта эътибор қаратилаётганини таъкидлади. Бугунги кунда бир қатор «яшил» лойиҳаларга 700 миллион доллардан ортиқ маблағ йўналтирилди.

Қанат Шарлапаев Саудия Арабистони тадбиркорларини «Байтерек» холдинги билан биргаликда Қозоғистонда қайта тикланадиган энергия манбалари бўйича қўшма лойиҳаларни амалга оширишга таклиф қилди, чунки Саудия Арабистони бу борада катта тажриба ва амалиётга эга.

«Байтерек» холдинги раиси замонавий геосиёсий ноаниқлик шароитида Қозоғистонда бизнес ишончли ҳамкорга эга бўлиш узоқ муддатли барқарор муваффақиятнинг калити эканлигини ва холдинг Саудия Арабистони компаниялари учун шундай ҳамкорга айланиши мумкинлигини таъкидлади.

У Саудия-Қозоғистон сармоявий давра суҳбати иштирокчиларини «Байтерек» холдинги Саудия Арабистони Қироллиги ва Қозоғистон ўртасидаги савдо-иқтисодий ва сармоявий ҳамкорликни мустаҳкамлаш учун барча саъй-ҳаракатларини амалга оширишига ишонтирди.