Қозоғистон ва Европа Иттифоқи ўртасида стратегик шериклик тўғрисидаги ҳужжат имзоланди

ASTANA. Kazinform – Қозоғистон ва Европа Иттифоқи барқарор хомашё, аккумуляторлар ва «яшил» водород қўшилиш занжири соҳасида стратегик шериклик бўйича ўзаро англашув меморандумини тасдиқлади, деб хабар беради Kazinform.

Ҳужжатни Мисрда бўлиб ўтган Иқлим ўзгариши бўйича глобал конференциянинг (COP27) Жаҳон етакчилари саммити доирасида Қозоғистон Республикаси Бош вазири Алихан Смаилов ва Европа комиссияси Президенти Урсула фон дер Ляйен имзолади.

Бош вазир ўз нутқида янги меморандумнинг муҳимлигини таъкидлади.

«Ҳужжатнинг имзоланиши Қозоғистоннинг Европа Иттифоқи саноат алянслари билан молиявий ва технологик ҳамкорлигини йўлга қўйиш учун шароит яратади. Умуман олганда, мамлакатимизда Европа бизнеси учун жуда жозибадор бўлган барча зарур омиллар, жумладан, диверсификацияланган энергия манбалари ва юқори транзит-транспорт салоҳияти мавжуд»

, - деди Алихан Смаилов.

Шунингдек, у Европа Иттифоқи - Қозоғистоннинг энг йирик ва энг муҳим савдо шериги бўлиб қолаётганини, мамлакат ташқи савдо улушининг 30 фоизга яқини Европа Иттифоқига тегишли эканлигини айтди.

«Шунингдек, бугунги кунда биз сармоявий ҳамкорликни ошириш ва ўзаро савдо ҳажмини ошириш учун салмоқли салоҳият мавжудлигини кўрмоқдамиз»

, - деди ҚР Бош вазири.

Ўз навбатида, Урсула фон дер Ляйен Европа Иттифоқи Қозоғистон иқтисодиётининг энг йирик инвесторларидан бири эканлигини, бугун имзоланган меморандум бу муносабатларни янада кенгайтиришини таъкидлади.

«Биз узоқ йиллик муносабатларимизнинг янги саҳифасини очдик. Европа Иттифоқи ва Қозоғистон кўп йиллардан буён мустаҳкам иқтисодий алоқаларни ривожлантириб келмоқда. Биз стратегик ишлаб чиқариш занжирларимиз интеграциясини кучайтириш учун биргаликда ишлаяпмиз. Бу ноёб тупроқ элементларини ишлаб чиқариш, аккумулятор ишлаб чиқариш ва «яшил» водородга тааллуқлидир»

, - деди Урсула фон дер Ляйен.

Унинг сўзларига кўра, ушбу ишлаб чиқариш занжирлари бутун дунё бўйлаб «яшил» ва рақамли трансформациянинг двигателлари ҳисобланади.

Фото: primeminister.kz