Қозоғистон Президенти Валентина Матвиенкони қабул қилди
Президент Қасим-Жомарт Тоқаев Қозоғистонга расмий ташриф билан келган Россия Федерал Мажлисининг Федерация Кенгаши Раиси Валентина Матвиенко билан учрашди.
Учрашув чоғида Қозоғистон ва Россия ўртасидаги кўп томонлама стратегик шериклик ва иттифоқни мустаҳкамлаш истиқболлари муҳокама қилинди. Шунингдек, савдо-иқтисодий, маданий-гуманитар ҳамкорлик, Евроосиё интеграцияси ва коронавирус пандемиясига қарши курашда икки мамлакатнинг биргаликдаги саъй-ҳаракатлари муҳокама қилинди.
Давлат раҳбари Федерация Кенгаши делегациясига ҳурмат бажо келтирди ва Валентина Матвиенконинг мамлакатлар ўртасидаги икки томонлама муносабатларни ривожлантириш ва мустаҳкамлашга қўшган ҳиссасини юқори баҳолади. Шунингдек, у МДҲ Парламентлараро ассамблеяси Кенгаши Раисининг самарали фаолиятини қайд этди.
Президент Қозоғистон ва Россия ўртасидаги муносабатларни яқинлаштиришда қонун чиқарувчи ҳокимиятнинг ролини таъкидлади.
«Мен парламент дипломатияси давлатлараро ҳамкорликни ривожлантиришда муҳим рол ўйнайди, деб ҳисоблайман. Бу, айниқса, Қозоғистон ва Россия Федерацияси ўртасидаги ҳамкорликка тегишли. Биз учун дўстлик ва иттифоқчилик муносабатлари асосий устувор йўналишдир «, - деди Қасим-Жомарт Тоқаев.
Шунингдек, Президент Федерация Кенгаши раисига мамлакатда амалга оширилаётган сиёсий ва иқтисодий ислоҳотлар тўғрисида маълумот берди.
Валентина Матвиенко учрашиш имконияти учун Президентга самимий миннатдорлик билдирди ва пойтахт ҳақидаги таассуротлари билан ўртоқлашди.
«Владимир Путин бир вақтлар Нур-Султан шаҳрини замонавий мўъжиза деб атаганди. Дарҳақиқат, шаҳар бизнинг кўз олдимизда қад кўтарди. 6 июл куни шаҳар кунини нишонлашингизни биламан. Сизни ва Нур-Султаннинг барча аҳолисини келаётган байрамлар билан табриклайман», - деди Валентина Матвиенко.
Шунингдек, Валентина Матвиенко Қасим-Жомарт Тоқаевга Сенат ва Мажлисда бўлиб ўтган музокаралар натижалари тўғрисида гапириб берди.
Учрашув якунида Қасим-Жомарт Тоқаев россиялик ҳамкасби Владимир Путинга самимий миннатдорлик билдирди.