Қозоғистон Президенти ЕХҲТ Бош котиби Хельга Шмид билан учрашди
«Сиз бошчилигидаги ЕХҲТ делегацияси ушбу форумда кўплаб долзарб масалаларнинг ижобий ҳал этилишига катта ҳисса қўшади, деб ўйлайман. Афсуски, бугунги кунда дунёда бундай муаммолар мавжуд. ЕХҲТ билан ҳамкорликни мустаҳкамлаш Қозоғистон учун устувор вазифа саналади. Ташкилотнинг роли ҳақидаги фикрлар зиддиятидан хавотирдамиз. 2010 йилда Астанада бўлиб ўтган саммитдан кейин на вазирлар даражасида, на бошқа форматда бирорта ҳам расмий ҳужжат қабул қилинмади. Албатта, бу бизни хавотирга соляпти. Биз ташкилот доирасидаги муносабатларни мустаҳкамлаш зарурлигига тўлиқ ишонамиз», - деди Қасим-Жомарт Тоқаев.
Давлат раҳбарининг сўзларига кўра, Қозоғистон ЕХҲТнинг фаол аъзоси ҳисобланади. Президент мамлакатимиз ЕХҲТ билан ўзаро манфаатли шериклик ва очиқлик руҳида яқин муносабатларни янада мустаҳкамлашга ҳамда мазкур ташкилот Бош котиби Хельга Шмидни ҳар томонлама қўллаб-қувватлашга тайёр эканини маълум қилди.
Ўз навбатида Бош котиб Хельга Шмид Қасим-Жомарт Тоқаевга Астана халқаро форумида иштирок этишга таклиф қилгани учун миннатдорчилик билдирди.
«Сиз тўғри айтасиз. Менимча, ҳозир қийин давр. Қийинчиликларга қарамай, ЕХҲТ мулоқот учун ягона форум сифатида фаолият юритишда давом этади. Қозоғистоннинг Европада Хавфсизлик ва Ҳамкорлик Ташкилотидаги фаол ролини ҳам ижобий баҳолайман. Сиз Астана саммитини тилга олдингиз. Мен ўша йиғилишда қатнашдим. Сиз ҳақсиз, бу охирги саммит эди. Астана декларацияси, аслида, ташкилот фаолиятини тартибга солувчи муҳим ҳужжатлардан биридир. Астана форумидаги нутқингизни интиқлик билан кутаман. Энди келишувга эришиш учун бир-бирининг фикрини тинглаш жуда муҳим деб ҳисоблайман. Бу ЕХҲТнинг асосий вазифасидир», - деди ЕХҲТ Бош котиби.
Учрашувда Қозоғистон ва ЕХҲТ ўртасидаги ҳамкорликнинг бугунги ҳолати ва уни ривожлантириш истиқболлари муҳокама этилди. Минтақавий ва глобал кун тартибидаги долзарб масалалар ҳам кўриб чиқилди.
