Қозоғистон немис инвесторлари учун энг қулай шарт-шароитларни яратиб бермоқда – Мухтар Тилеуберди

ASTANA. Kazinform - Қозоғистонга Германия иқтисодиётининг етакчи тармоқлари вакилларидан иборат йирик бизнес делегацияси келди. Бу ҳақда Қозоғистон Бош вазири ўринбосари – Ташқи ишлар вазири Мухтар Тилеуберди маълум қилди, дея хабар беради Kazinform мухбири.

ҚР Ташқи ишлар вазирининг айтишича, олиб борилаётган музокаралар салоҳиятли лойиҳалар ва ўзаро манфаатли янги йўналишларни аниқлашга хизмат қилмоқда.

«Қозоғистон сармоя киритиш учун жозибадор давлат. 2021 йилда биз нафақат хорижий инвестициялар оқимининг пандемиядан олдинги даражасига қайтдик, балки уни 38 фоизга оширишга ҳам эришдик. Ўтган йил якунларига кўра, Қозоғистонга тўғридан-тўғри хорижий инвестициялар оқимининг умумий ҳажми 24 миллиард долларни ташкил этди, бу 2020 йилга нисбатан 37,7 фоизга кўпдир. Иқтисодиёти бўйича дунёда тўртинчи ўринни эгаллаган Германия ҳали ҳам иқтисодиётимизга сармоя киритган етакчи ўнта давлат қаторига кирмаган. Шунинг учун биз немис инвесторлари ва Қозоғистон ишбилармонларига ишлаш учун энг қулай шарт-шароитларни таклиф қилишимизга эътибор қаратамиз. Шу мақсадда Бош вазирнинг биринчи ўринбосари Роман Скляр бошчилигида немис инвесторлари ва тадбиркорлари билан ўзаро ҳамкорлик бўйича ягона ҳукумат ишчи гуруҳини туздик»

, — деди М. Тилеуберди Германия Федерал ташқи ишлар вазири Анналена Бербок билан учрашувдан кейин.

Шу муносабат билан тилга олинган ишчи гуруҳ туфайли немис инвесторларининг лойиҳалари музокаралар бошланганидан то ишлаб чиқаришни тўлиқ ташкил этишгача қўллаб-қувватланмоқда.

«Биз иқтисодиётимизнинг 700 та йирик, ўрта ва кичик активларини хусусийлаштирмоқдамиз. Бу немис тадбиркорлари учун қўшимча истиқболларни очади. Германия сармоялари, илғор технологиялар ва ноу-хау, Қозоғистоннинг хомашёси, малакали ишчилари ва қулай бизнес шароитлар «ғалаба қозониш» тамойили бўйича ҳамкорликни кенгайтириш учун ишончли замин яратмоқда. Шу нуқтаи назардан, Қозоғистонда хомашё, нодир металларни бирламчи қайта ишлаш, шунингдек, иқтисодиётнинг юқори технологияли тармоқлари учун зарур бўлган экологик тоза энергия манбаларини ишлаб чиқаришни яратиш соҳасидаги ҳамкорлик долзарб ҳисобланади. Бунинг ҳуқуқий асоси 2012 йилда хомашё, саноат ва технологик ҳамкорлик тўғрисидаги ҳукуматлараро битим имзоланиши билан яратилган эди»

, — деди М. Тилеуберди.

Муаллиф: Руслан Ғаббасов