Қозоғистон мустақиллигининг 30 йилида эришилган ютуқлар Нидерландиянинг Клингендаль институтида муҳокама қилинди
Йиғилишда мамлакат илм-фан, бизнес ва академия вакиллари ҳамда таниқли экспертлар иштирок этди.
ҚР Ташқи ишлар вазирининг биринчи ўринбосари Ерлан Алимбаев ўзининг кириш сўзида Қозоғистоннинг Биринчи Президенти Нурсултон Назарбоев раҳнамолигида Мустақилликнинг 30 йиллиги иқтисодий тараққиёт ва барқарор ривожланиш даврига айланганини таъкидлади. Шу билан бирга, қозоғистонлик дипломат Давлат раҳбари томонидан таклиф этилган, мамлакатда муҳим демократик жараёнларни амалга оширишга қаратилган асосий ислоҳотлар ҳақида гапирди.
Е.Алимбаев Нидерландия Қозоғистоннинг Европадаги асосий савдо-иқтисодий ҳамкорларидан бири, мамлакатдаги энг йирик инвестор эканлигини таъкидлади.
Шунингдек, у Қозоғистон Европа Иттифоқининг Европа Яшил йўналишининг (European Green Deal) мақсад ва вазифаларига эришишга тайёр эканлигини таъкидлади.
Нидерландиянинг Қозоғистондаги собиқ Элчиси Ханс Дриссер модераторлик қилган эксперт сессиясининг мавзуси «ЕИ ва Қозоғистон ўртасида яшил энергия соҳасида ҳамкорлик истиқболлари» бўлди.
Клингендаль институтининг Европа Иттифоқи масалалари ва глобал алоқалар бўлими раҳбари Луиза Ван Схаик Европа Иттифоқи-Қозоғистон муносабатларида нефть ва табиий газ савдоси устувор йўналиш эканини айтди.
Шу билан бирга, у Европа Иттифоқи ва Қозоғистон ўртасида қайта тикланадиган энергия соҳасида ҳамкорликни фаоллаштириш учун қўлланилиши лозим бўлган воситаларни қайд этди.
Гаага стратегик тадқиқотлар маркази асосчиси, Лейден университети профессори Роб де Вейк Қозоғистоннинг қайта тикланадиган энергия салоҳияти икки томонлама ҳамкорлик, жумладан, водород энергетикаси учун платформага айланиши мумкинлигини айтди.
Ўз навбатида, Қозоғистон Президенти ҳузуридаги «Яшил иқтисодиёт» бўйича кенгаш аъзоси, профессор, «Яшил Академия» илмий-таълим маркази директори Бахит Есекина Қозоғистон иқтисодиётида углероддан қутулиш йўллари ҳақида гапирди.
Қозоғистон Республикаси Биринчи Президентининг Лондондаги Жамғармаси раҳбари Ғани Бекенов иштирокчиларни Жаҳон иқтисодиёти ва сиёсати институти ҳамда Нурсултон Назарбоев жамғармаси ҳамкорлигида ташкил этилган Аstana Club 3 халқаро муҳокама майдончаси фаолияти билан таништирди. Шунингдек, у Жаҳон иқтисодиёти ва сиёсати институти ва Клингендаль институти ўртасида яқинроқ алоқа ўрнатишни таклиф қилди.
Шу билан бирга, у институт вакилларини Аstana Clubнинг навбатдаги йиғилишларида иштирок этишга таклиф қилди. Учрашув якунида томонлар энергияни ташиш, яшил энергия соҳасида ҳамкорликнинг муқобил имкониятлари ҳақида фикр алмашдилар.
