«Қозоғистон халқига» жамғармаси Шимолий Қозоғистон вилоятидаги 7 та махсус мактабга замонавий жиҳозлар сотиб олади
Шимолий Қозоғистон вилояти таълим бошқармаси бошлиғи Назир Жашибековнинг сўзларига кўра, «Қозоғистон халқига» жамғармаси ҳисобидан Соколов, Ломоносов, Чкалов номидаги коррекцион мактаб-интернатлари ҳамда вилоят эшитиш қобилияти заиф болалар мактаб-интернати учун замонавий жиҳозлар харид қилинади. Улар орасида дурадгорлик, чилангарлик, тикувчилик устахоналари, психолог ва логопедлар кабинетлари, спорт залларини жиҳозлаш вазифаси мавжуд. Хусусий инвестициялар ҳажми 77,7 млн тенгени ташкил этади.
«Кузда яна 3 та тузатиш мактабининг моддий-техник базасини мустаҳкамлашни режалаштирганмиз, улар Шоптиколдаги №1 ва №2 коррекцион мактаб-интернатларидир. Буларнинг барчаси махсус болаларни мослаштириш ва ижтимоийлаштиришга қаратилган.
Шунингдек, Петропавл шаҳридаги 3 та мактабда - №5, 9, 42 умумтаълим мактабларида инклюзияни қўллаб-қувватлаш учун ўқув хоналарини очамиз.
Алоҳида таълимга муҳтож болаларга келсак, уларга шароит яратиш устувор вазифаларимиздан биридир. Бугунги кунда психологик-тиббий-педагогик консультациялар ва тузатиш кабинетларида навбатларни камайтириш бўйича ишлар олиб борилмоқда. Шу мақсадда вилоят психологик-тиббий-педагогик комиссияси икки сменада иш бошлади. Йил охиригача яна бир аутизм маркази очишни режалаштирганмиз, - дейди Назир Жашибеков.
Жорий йилда алоҳида таълимга муҳтож болаларнинг қўшимча таълим олиши учун шароит яратилади.
«Айни пайтда «Жас Дарин» санъат мактабига «Фортепиано», «Тасвирий санъат», «Хореография» ва «Декоратив-амалий ижод» йўналишлари бўйича қабул олиб борилмоқда. Келгусида вилоят болалар ва ўсмирлар маданият марказида алоҳида таълимга муҳтож болалар учун тўгараклар очилади, - дейди бошқарма раҳбари.
Муаллиф: Ақерке Дауренбекқизи