Валюталар курси:
    usd/kzt 460.95 eur/kzt 487.18

    rub/kzt 8.66 cny/kzt 68.91
Об-ҳаво маълумотлари:
Нур-Султон : 1 °С
Алматы: 15 °С

Қозоғистон Эрон билан транспорт ва логистикани ривожлантириш бўйича музокаралар олиб бормоқда

23 Май 18:49

TEHRAN. Kazinform - Эрон ва Қозоғистон транспорт ва логистика соҳасидаги муҳим минтақавий марказларга айланиши мумкин. Бу ҳақда ҚР Бош вазир ўринбосари – савдо ва интеграция вазири Бақит Султановнинг Эрон Ислом Республикаси биринчи Вице-президенти Мохаммад Мохбер билан учрашуви чоғида маълум қилинди, дея хабар беради Kazinform.

Ҳукуматнинг матбуот хизмати хабарига кўра, Қозоғистон делегацияси Теҳронда Эрон Ислом Республикаси раҳбарияти билан икки давлат ўртасидаги савдо-иқтисодий ҳамкорликни кенгайтириш ва транзит салоҳиятини фаоллаштириш бўйича музокаралар ўтказди.

Эрон Ислом Республикаси биринчи Вице-президенти Мохаммад Мохбер билан музокаралар чоғида Қозоғистон томони Эрон орқали «Шимоли-Жанубий» йўналишида, сўнгра Форс кўрфази, Жанубий Осиё мамлакатларига ва бошқа минтақаларга, жумладан мультимодал юк ташишдан фойдаланишдан манфаатдорлигини яна бир бор тасдиқлади. Қозоғистон-Эрон транспорт ҳамкорлигини кенгайтириш муҳимлиги ҳақида гапирар экан, Эрон томони транспорт-логистика соҳасидаги ҳамкорликни ривожлантириш бўйича музокаралар самарали эканлигини қайд этди. Эроннинг биринчи Вице-президенти Мохбернинг қайд этишича, бу мақсадларга эришиш Эрон ва Қозоғистонни муҳим минтақавий марказларга айлантириши мумкин.

Ҳар икки томон ҳам сўнгги йилларда товар айирбошлаш ҳажмининг ўсишида ижобий тенденция кузатилаётганини қайд этди. Шу билан бирга, Эрон билан савдо бўйича жорий халқаро чекловлар остида салоҳият муҳимлигича қолмоқда. Масалан, озиқ-овқат саноати соҳасида Қозоғистон дон, қандолат ва ун маҳсулотлари, гўшт ва гўшт маҳсулотлари, шунингдек, бошқа чорвачилик маҳсулотлари экспортини оширишга тайёр. Айни пайтда Қозоғистонда Эрон мева-сабзавотларига талаб ҳам бор.

Музокаралар чоғида саноат кооперацияси соҳасида ҳамкорликни кенгайтириш масалалари ҳам муҳокама қилинди. Қишлоқ хўжалиги маҳсулотларини қайта ишлаш соҳасида қўшма лойиҳалар, масалан, қишлоқ хўжалиги хомашёсини қайта ишлаш лойиҳаларини амалга ошириш учун катта имкониятлар мавжудлиги таъкидланди.

Бундан ташқари, савдо, қишлоқ хўжалиги, соғлиқни сақлаш, нефт, транспорт ва шаҳарсозлик вазирликларида, шунингдек, темир йўл бошқармаси, Миллий банк, Миллий нефт компанияси, Савдо-саноат палатаси ва айрим вилоятлар раҳбарлари билан учрашувлар ўтказилди.

Эслатиб ўтамиз, Қозоғистонда Эрон сармоядорлари иштирокида гўштни қайта ишлаш корхонаси қуриш, ёғли ўсимликларни қайта ишлаш, ғалла йиғиш машиналарини йиғиш ва бошқа лойиҳалар муваффақиятли амалга оширилди.

Эрон томони савдо миссиялари, маҳсулотлар кўргазмалари ва ютуқлар алмашинуви икки давлат хусусий сектори ва тадбиркорлари ўртасидаги ҳамкорликни кенгайтиришга хизмат қилишини қайд этди.


Новости по теме
Ўхшаш янгиликлар