Қостанай заводида йил бошидан буён 54 мингдан ортиқ автомобил йиғилди

QOSTANAY. Кazinform - Йил бошидан буён Қостанай автомобил заводининг конвееридан 54 мингдан ортиқ автомобил чиқди, улардан 2 мингдан ортиғи экспорт қилинди. Бу ҳақда вилоят иқтисодиёт ва бюджетни режалаштириш бошқармаси бошлиғи Гулбарам Мусағазина маълум қилди, дея хабар беради Kazinform мухбири.

Вилоятда, маърузачи таъкидлаганидек, ишлаб чиқариш тармоғи, хусусан, машинасозлик жадал ривожланиб, бу ерда ишлаб чиқарилаётган енгил автомобил моделлари тури муттасил кенгаймоқда.

– Жорий йилнинг 10 ойи давомида 54 мингдан ортиқ автомобил йиғилиб, шундан 2 минг 358 дона экспорт қилинди. Айтиш жоизки, республикамизда ишлаб чиқарилаётган барча автомашиналарнинг 61 фоиздан ортиғи вилоятимиздаги корхоналар конвеерларига тўғри келади, – дейди Гулбарам Мусағазина. – Декабр ойида автомобил заводининг йиғиш майдончасида кичик ҳажмдаги йиғиш қуввати оширилади, Deutz-Fahr, Lovol и Turan тракторларини ишлаб чиқариш йўлга қўйилди.

Шунингдек, Қостанай заводи Ўзбекистон заводи билан саноат ҳамкорлигида ишлаб чиқарилаётган автомобиллар қаторини йилига 30 минг дона янги Chevrolet Onix автомобиллари билан тўлдиради. Лойиҳани амалга ошириш учун қарийб 23 миллиард тенге сармоя жалб этиш режалаштирилган. Бундан ташқари, бу ерда «Беларусь» тракторлари учун кабиналар ишлаб чиқариш режалаштирилган.

Айтиш жоизки, 2021 йилда бу ерда 60 мингдан ортиқ автомобил ишлаб чиқарилган. Ҳар 10-автомобил МДҲ мамлакатларига экспорт қилинган.

Муаллиф: Жанат Мусабаева