Коронавирусга қарши вакцина яратган олим унинг хавфсизлигига кафолат берди

NUR-SULTAN. Kazinform – Қозоғистон Республикаси Таълим ва фан вазирлиги Илмий қўмитаси Биологик хавфсизлик муаммолари илмий-тадқиқот институти бош директори Кунсулу Закаря ушбу препаратни синовдан ўтказган кўнгиллилар орасида Қозоғистон вакцинасининг ён таъсири кузатилгани ростми деган саволга жавоб берди, деб хабар беради Kazinform мухбири.

«1958 йилдан бери Биологик хавфсизлик муаммолари илмий-тадқиқот институти хавфли ва ўта хавфли инфекцияларга қарши тахминан 70 турдаги вакциналарни ишлаб чиқди.

QazCovid-in вакцинаси ишончли ва вақт синовидан ўтган эмлаш технологияси асосида ишлаб чиқилган. Ушбу вакцинанинг барча таркибий қисмлари яхшилаб ўрганилган ва хавфсиздир. Вакцинанинг янги компоненти фақат кимёвий фаол бўлмаган вируснинг ўзи ҳолос. Вирус инактивация қилинганлиги (ўлдирилганлиги) сабабли, у эмланган одамларнинг организмида кўпайиши мумкин эмас ва ҳатто иммунитети заиф одамларда ҳам касаллик келтириб чиқариши мумкин эмас», - деди олим.

Институт шунингдек рекомбинант суббирламчи вакцинани ҳам ишлаб чиққан. Жаҳон соғлиқни сақлаш ташкилоти иккала вакцинани ишлаб чиқиш протоколларини кўриб чиқди ва уларни номзод вакциналар расмий рўйхатига киритди.

«Яна учта вакцина ишлаб чиқилмоқда: каприпоксвирусга асосланган рекомбинант векторли вакцина, грипп вирусига асосланган рекомбинант векторли вакцина ва тирик вакцина. Шуни таъкидлаш керакки, дунёдаги ҳеч бир институт, бизникидан ташқари, бир вақтнинг ўзида 5 та платформада коронавирус инфекциясига қарши вакцинани ишлаб чиқараётгани йўқ. Ҳозирги шароитда энг самарали вакцинани топиш учун шундай йўл тутяпмиз», - деди Кунсулу Закаря.

Унинг айтишича, бугунги кунда Қозоғистоннинг QazCovid-in вакцинаси клиник синовларнинг учинчи босқичига етиб келган 240дан ортиқ номзод вакциналар орасида 15-чи вакцинадир.

«Биологик хавфсизлик муаммолари илмий-тадқиқот институти томонидан ишлаб чиқарилган коронавирус инфекциясига қарши QazCovid-in инактивацияланган вакцинаси Қозоғистон Республикаси Соғлиқни сақлаш вазирлигидан вақтинча рўйхатдан ўтиш гувоҳномасини олди. Қозоғистон COVID-19га қарши вакцинани рўйхатдан ўтказган дунёдаги 6-чи давлат бўлиб, «QazCovid-in» коронавирусига қарши маҳаллий вакцинаси расмий рўйхатдан ўтган 9-вакцинага айланди. Вакцина инактивацияланган вирусга асосланган ва таркибида зарарсиз адъювант бор, шунинг учун препаратнинг бошқа вакцина препаратларига нисбатан хавфсизлиги кафолатланади. Ушбу вакцина билан эмланган фуқаролар ўзларини яхши ҳис қилишмоқда, бугунги кунда ножўя таъсирлари қайд қилинмаган», - дея тушунтирди олим.

Муаллиф: Ақбота Кузекбай