Конституциявий суд Адолатли Қозоғистоннинг кўзгуси бўлади - Қасим-Жомарт Тоқаев
Давлат раҳбари Конституциявий суд мамлакат ҳаётида алоҳида ўрин тутадиган орган эканлигини таъкидлаб, 27 йил давомида самарали меҳнат қилган Конституциявий кенгаш аъзоларига, ҳар бир босқичда меҳнат қилган ходимларга миннатдорлик билдирди.
«Бугун Қозоғистон янги даврга қадам қўйди, мисли кўрилмаган сиёсий ислоҳотлар амалга оширилди. Ҳозирда дунёда бундай кенг кўламли ва кенг қамровли ислоҳотларни амалга ошираётган саноқли давлатлар бор. Бу ҳақиқат. Буни бутун дунё тан олади. Қозоғистон ислоҳотчи давлатга айланди. Умуман олганда, мамлакатда кўплаб ўзгаришлар рўй бермоқда. Фуқароларнинг конституциявий ҳуқуқларини ҳимоя қилишга алоҳида эътибор қаратилмоқда. Бу ишда жамоатчилик вакиллари фаол иштирок этишга интилмоқда. Шунинг учун мен Конституциявий суд тузиш ташаббуси билан чиқдим. Бу ва бошқа таклифларни фуқароларимиз умумхалқ референдумида қўллаб-қувватлади», - деди Президент.
Давлат раҳбари Конституциявий суд барча қонунлар ва ҳуқуқий ҳужжатларнинг Конституцияга мувофиқлигини таъминлаши зарурлигини таъкидлади.
«Дарҳақиқат, Конституциявий суд мамлакатимиз учун жуда муҳим институтдир. Эндиликда фуқароларимиз Конституцияга зид бўлган нормаларни қонунга хилоф деб топиш юзасидан бевосита Конституциявий судга мурожаат қилишлари мумкин. Бундан ташқари, Бош прокурор ва Инсон ҳуқуқлари бўйича вакил Конституциявий судга шикоят қилиш ҳуқуқига эга. Умуман олганда, прокуратура, судлар, ҳуқуқни муҳофаза қилиш органлари фаолиятига қўйиладиган талаблар сезиларли даражада ошади. Конституциявий суд депутатлар ва ҳукуматнинг қонун ижодкорлиги фаолиятига ижобий таъсир кўрсатади. Бир сўз билан айтганда, Конституциявий суд инсон ҳуқуқларини ҳимоя қилиш тизимининг асосий таянчига айланади», - деди Қасим-Жомарт Тоқаев.
Қозоғистон амалга оширилаётган ислоҳотларнинг сони, энг муҳими, мазмун-моҳияти ва сифати бўйича дунёда етакчи давлатлардан бири эканлигига шубҳа йўқ.
«Дарҳақиқат, фақат ўтган йилги ишлар жамиятимиздаги ўзгаришлар кўлами ва теранлиги ҳақида ижобий таассурот қолдирмаслиги мумкин эмас. Қозоғистон давлат сифатида сезиларли даражада модернизация қилинди. Бу ҳақиқат жаҳон ҳамжамияти томонидан очиқ эътироф этилди. Буни кўплаб халқаро алоқалар ва олий даражадаги учрашувлар тасдиқлайди. Конституциявий суд Адолатли Қозоғистоннинг кўзгуси бўлади, десак муболаға бўлмайди», – деди Қасим-Жомарт Тоқаев.
Фото: akorda.kz