Кичик ва ўрта бизнес эгалари Японияда амалиёт ўташи мумкин

ASTANА. Каzinform – Мамлакатдаги кичик ва ўрта бизнес эгаларига Японияда амалиёт ўташ имконияти берилади, деб хабар беради Кazinform мухбири.

Бу ҳақда BUSINESS TECHNOLOGY EXPO 2023 халқаро кўргазмаси доирасида ўтказилган бизнес-форумда ҚР Миллий иқтисодиёт вазирлигининг Тадбиркорликни давлат томонидан қўллаб-қувватлаш департаменти директори ўринбосари Мерей Исаева маълум қилди.

«Қўллаб-қувватлашнинг молиявий бўлмаган турлари бизнесни ахборот ва экспертиза билан қамраб олишга қаратилган. Шу тариқа, кичик ва ўрта бизнес субъектларига рухсатнома олиш, хорижлик ҳамкасблар билан ишбилармонлик алоқаларини ўрнатишда ёрдам кўрсатилади. Биз ҳар йили етакчи тадбиркорларни Германияга икки ҳафталик бизнес тренингларига юборамиз. Жорий йилдан бошлаб 10 нафар тадбиркорни Японияга амалиёт ўташга жўнатамиз. Шунингдек, бу масала Жанубий Корея билан ҳам ишлаб чиқилмоқда», - деди Мерей Исаева.

Унга кўра, «Бизнеснинг йўл харитаси» ва «Оддий нарсалар иқтисодиёти» дастурларини амалга оширишнинг бутун даврида кичик ва ўрта бизнес объектларида 119 мингта иш ўрни яратилган.

50 триллион тенге миқдоридаги маҳсулот ишлаб чиқарилиб, бюджетга 3 триллион тенге тўланган.

– Жорий йилдан бошлаб «Мен тадбиркорман» деган янги восита пайдо бўлди. Бу орқали тадбиркорлик фаолиятини энди бошлаган тадбиркорларга бизнес алифбосини ўргатиб, сертификат берамиз. Аёллар тадбиркорлиги учун алоҳида йўналиш мавжуд. Шу нуқтаи назардан, биз 7 та қўшимча хизматларни тақдим этамиз. У консультация, бизнес-тренинг, соҳани ўқитиш каби зарур чора-тадбирларни ўз ичига олади. Шунингдек, халқаро стандартларга мувофиқ бизнесни баҳолаш хизмати ҳам мавжуд. Халқаро тажрибага кўра, Қозоғистонда кичик ва ўрта бизнесни қўллаб-қувватлаш беқиёс, дейиш мумкин», — деди МИВ вакили.

Муаллиф: Есимжан Нақтибай