Қатар ривожланмаган мамлакатларга 60 млн доллар ёрдам ажратади

Автор:  
Ляззат Сейданова
6 Март, 09:28

Қатар ривожланмаган мамлакатларга 60 млн доллар ёрдам ажратади

ASTANA. Kazinform – Қатар кам ривожланган давлатлар учун Доҳа дастурини қўллаб-қувватлаш учун 60 миллион доллар ажратади. Бу ҳақда Қатар амири шайх Тамим бин Ҳамад Ол Соний маълум қилди, дея хабар беради Kazinform ТАСС агентлигига таяниб.

«Мен жами 60 миллион долларлик молиявий ёрдам беришни расман эълон қиламан, жумладан, энг кам ривожланган мамлакатлар учун Доҳа ҳаракат дастурини амалга ошириш учун 10 миллион доллар ва дастур натижаларини қўллаб-қувватлаш ва кам ривожланган мамлакатларнинг барқарорлигини мустаҳкамлаш учун 50 миллион доллар ажратилади», - деди Қатар амири Доҳада бўлиб ўтган БМТнинг кам ривожланган давлатлар бўйича бешинчи очиқ конференциясида.

Шунингдек, у халқаро ҳамжамиятни Қатардан ўрнак олишга ва Доҳа дастурини амалга оширишни қўллаб-қувватлашга «ташаббус кўрсатишга» чақириб, буни кам ривожланган мамлакатлар халқи олдидаги «инсонпарварлик бурчи» деб атади.

Доҳа ҳаракат дастури - 2022 йил март ойида келишилган кам ривожланган мамлакатлар ривожланиши учун йўл харитасидир. У олтита асосий йўналишни кўрсатади: қашшоқликни бартараф этиш; фан, технология ва инновациялар салоҳиятидан фойдаланиш; таркибий ўзгаришларни қўллаб-қувватлаш; халқаро савдо ва минтақавий интеграцияни ривожлантириш; иқлим ўзгариши ва пандемиядан кейинги тикланиш билан боғлиқ чоралар кўриш; халқаро ҳамкорликни йўлга қўйиш.