Қасим-Жомарт Тоқаев Қозоғистон халқини Янги йил билан табриклади
Ҳурматли ватандошлар!
Азиз юртдошлар!
Мана, биз суверенитет йилномасида яна бир муҳим босқичга эришдик. Биз эски йил билан хайрлашиб, янги йилга қадам қўймоқдамиз. Бу ҳар бир киши ўзгача кайфият билан кутиб оладиган ўзига хос дақиқадир. Ўтган йилни сарҳисоб қилиб, кейинги давр учун режалар тузамиз.
2021 йил мамлакатимиз учун осон йил бўлмади. Бироқ халқимиз ҳар қандай синовга бардош бериб, барча тўсиқларни енгиб ўтди.
Пандемиянинг қийинчиликларига қарамай, биз кўп нарсага эришдик. Иқтисодиётимиз аста-секин тикланиб, одамлар нормал ҳаётга қайта бошлади. Тадбиркорликни ривожлантириш борасида самарали чора-тадбирлар амалга оширилди.
Ёш авлодга таълим-тарбия берувчи ўқитувчиларининг маошлари ошди.
Бир миллиондан ортиқ киши пенсия жамғармаларини уй-жой, ипотека ва даволанишга сарфлади.
Биринчи марта қишлоқ ҳокимларининг тўғридан-тўғри сайлови ўтказилди.
Инсон ҳуқуқлари соҳасида алоҳида чора-тадбирлар режаси тасдиқланди.
Имконияти чекланган шахсларни ҳар томонлама қўллаб-қувватлаш борасида тизимли ишлар амалга оширилди.
Менинг ташаббусим билан парламентда ислоҳотларни янада кучайтиришга янги суръат бахш этадиган қатор қонунлар қабул қилинди. Умуман олганда, ҳар бир соҳада аниқ натижаларга эришдик.
Давлат халқ фаровонлигини ошириш, мамлакат рақобатбардошлигини ошириш учун барча саъй-ҳаракатларини амалга оширди.
Мухтасар қилиб айтганда, бу йил қийин, аммо муваффақиятли йил бўлди. Буларнинг барчаси сизларнинг машаққатли меҳнатингиз туфайлидир.
Айни дамда эл-юртга хизмат қилаётган ҳар бир фуқарога самимий миннатдорчилигимни билдираман!
Ҳурматли ватандошлар!
Қозоғистон ҳар томонлама модернизация ва янгиланиш даврига айланиши керак бўлган мустақилликнинг тўртинчи ўн йиллигига ишонч билан қадам қўймоқда.
Бизнинг асосий мақсадимиз – ҳар бир фуқаро ишимизнинг ижобий натижаларини чинакам ҳис қилишидир.
«Инсон давлат учун эмас, давлат инсон учун» тамойилини ҳаётга татбиқ этиш муҳим. Бинобарин, ислоҳотларимиз марказида инсон манфаати ва ташвишлари туради.
Янги йилда энг кам иш ҳақи ва яшаш минимуми миқдори ортади.
Янги уйлар, йўллар қурилади.
Биз кичик ва ўрта бизнесни қўллаб-қувватлаш, тоза энергия, қишлоқ хўжалиги, технология саноатини ривожлантириш бўйича ишимизни кучайтирамиз.
Ижтимоий инфратузилма – мактаблар, шифохоналар, маданият ва спорт иншоотларини ободонлаштириш ишлари давом эттирилади.
Иқтисодиёт ва ижтимоий ҳаётни рақамлаштириш янги суръат олади.
Уч юздан ортиқ қишлоқ ҳокими сайланади.
Фуқаролар ишончини қайтариб бўлмайдиган қилиш мақсадида полиция ишнинг хизмат кўрсатиш моделига ўтади.
Ҳуқуқни муҳофаза қилиш ва суд-ҳуқуқ тизимини ислоҳ қилиш устида ҳам иш олиб борамиз.
Умуман олганда, мамлакатни сиёсий ва иқтисодий модернизация қилиш давом этади. Бу режаларнинг барчаси, албатта, халқимиз турмуш фаровонлигини оширишга қаратилган.
Барчамизни ажойиб нарсалар кутмоқда. Ваколатли шахслар зиммасига алоҳида масъулият юкланади. Фуқароларимиз фаровонлигини таъминлаш йўлида астойдил ҳаракат қилишимиз керак.
Пандемия ҳали бартараф этилганича йўқ, шунинг учун ҳотиржамликка берилиш мумкин эмас. Оммавий эмлаш ва қайта эмлаш давом этади.
Глобал беқарорлик ва геосиёсий муаммоларга қарамай, миллий бирлигимизни мустаҳкамлаш, даромадимизни ошириш, мамлакатимизни мустаҳкамлаш муҳим аҳамиятга эга. Шундай қилиб, биз ривожланишнинг янги босқичига киришимиз керак.
Қозоғистоннинг порлоқ келажаги бизнинг қўлимизда, яъни чинакам ватанпарвар, мамлакат тақдирига бефарқ бўлмаган садоқатли ва манфаатдор фуқаролар қўлида.
Мен давлат раҳбари сифатида ёш авлод келажагига катта аҳамият бераман. Ёшлардан умидим катта. Бу борада амалга оширилаётган кенг кўламли ишлар, ислоҳотлардан ёшларимиз албатта баҳраманд бўлади. Уларнинг барчаси очиқкўнгил, дунёқараши кенг, зеҳни тез. Ёш авлодга йўл очиш учун барча шароитларни яратишимиз керак.
Болаларга алоҳида эътибор берилиши керак. Уларнинг фаровонлиги давлатимиз муваффақиятли келажагининг ишончли кафолатидир.
Шунинг учун келгуси йилни Болалар йили деб эълон қилиш керак, деб ҳисоблайман.
Гап шиорлар ва байрам тадбирлари ҳақида эмас, биринчи навбатда, соғлиқни сақлаш, таълим, ижтимоий таъминот соҳаларида мутасадди ташкилотлар томонидан болаликни муҳофаза қилиш борасида амалга оширилаётган аниқ чора-тадбирлар ҳақида бормоқда.
Ўсиб келаётган ёш авлоднинг ҳар томонлама баркамол бўлиб вояга етиши, бахтли болалиги бизнинг умумхалқ вазифамиздир.
Азиз биродарлар!
Янги йил арафасида барчамиз бир-биримизга байрамона кайфият тилаймиз. Кейинги кундан фақат яхшилик кутамиз.
Қозоқ анъаналарига кўра, 2022 йил Йўлбарс йилидир.
Халқимиз тоғ чўққисини макон қилган ушбу жониворни муқаддас деб билган. Хўжа Аҳмад Яссавий мақбараси ва Мустақиллик монументидаги йўлбарс тасвири шунинг исботидир. Бугунги кунда қанотли йўлбарс янги Қозоғистоннинг рамзига айланди.
Турон йўлбарси популяциясини қайта тикламоқчимиз. Бу ҳам келгуси йил учун муҳим вазифадир.
Кириб келаётган йил юртимиз учун баракали йил бўлсин!
Янги йилда ҳар бир оила бахтли бўлсин!
Барчангизга тинчлик ва бахт тилайман!
Мустақил юртимиз равнақ топсин!
Азиз дўстлар!
Бутун қалбим билан сизга фаровон, бахтли Янги йил тилайман!
Келгуси йилда саломатлик, муваффақият ва омад сизга ишончли ҳамроҳ бўлсин!
Янги йил муборак бўлсин!