Қасим-Жомарт Тоқаев Exit poll натижалари билан танишди
Exit poll натижалари эълон қилинганидан сўнг, Қасим-Жомарт Тоқаев Республика жамоат штаби аъзолари олдидаги нутқида бугунги кун ўзгача ва тарихий кампания эканини таъкидлади.
«Бу кампания, шубҳасиз, тарихимизда қолади. Exit pollнинг дастлабки натижалари эълон қилинди. Албатта, расмий хулосани кутамиз. Аммо ҳозирнинг ўзида шуни айтиш мумкинки, халқимиз менга Президент сифатида катта ишонч билдирмоқда. Одамларнинг ишончи энг қимматли нарса. Шундай экан, барчамиз халқ ишончини оқлашимиз керак. Бугун, 21 ноябрдан бошлаб барчамиз ишга киришишимиз керак»
, - деди Қасим-Жомарт Тоқаев.
Унинг сўзларига кўра, сайлов қонун асосида ўтказилди. Қозоғистон Республикаси Президентлигига номзодларнинг барчасига тенг имконият берилди.
«Улар ҳудудларга бемалол ташриф буюришди. Сайловчилар билан учрашиб, ташвиқот ишларини олиб борди. Яъни, ҳеч кимга ҳеч қандай чекловлар йўқ. Ҳар бир сайловчига ўз танловини қилиш эркинлиги берилди. Шунинг учун ҳам бу кампания адолатли ва очиқ бўлди»
, — деди Қасим-Жомарт Тоқаев.
Қасим-Жомарт Тоқаев президентлик сайлови янги сиёсий даврга йўл очишини айтиб, келажакда ҳокимиятнинг барча асосий институтлари модернизация қилинишини айтди.
«Конституциявий ислоҳотни тўлиқ ва аниқ амалга оширамиз. Мамлакатимизнинг сиёсий тузилишини тиклаймиз. Биз иқтисодиётни тубдан ўзгартирамиз. Халқимиз фаровонлигини оширамиз. Буни тўғри йўлга қўйиш учун бизга бирдамлик керак. Шундай экан, келинг ҳар доим бирга бўлайлик!»
, – деди Қасим-Жомарт Тоқаев.
У ўз сўзининг якунида тадбир иштирокчиларини биргаликда Янги, Адолатли Қозоғистонни яратишга чорлади ва уларга омад тилади.
Марказий сайлов комиссияси маълумотларига кўра, кеча соат 22.00 ҳолатига кўра, республика бўйича 8 миллион 299 минг 501 нафар фуқаро сайлов бюллетенини олган. Бу рўйхатга киритилган фуқароларнинг 69,43 фоизини билдиради. 4 та ҳудудда сайловчиларнинг 80 фоиздан ортиғи овоз берди.
Айни пайтда Қозоғистоннинг хорижий давлатлардаги ваколатхоналари ёнидаги 68 та участканинг бир қисми ҳозирда ўз ишини якунлади.
Фото:t.me/toqaev2022