Калифорния соҳилларида иккита муҳожир қайиғи чўкиб кетди
Сан-Диегодаги Блекс пляжи яқинида қайиқлар ағдарилиб кетганидан кейин омон қолганларни қидириш бошланди.
911 рақамига қўнғироқ қилган аёл саккиз киши бўлган қайиқда қирғоққа етиб келганини айтди. Аёлнинг сўзларига кўра, бортида саккиз-ўн киши бўлган яна бир қайиқ ағдарилган.
Сан-Диего фавқулодда хизматлар бошлиғи Жеймс Гартланд воқеани штатдаги энг даҳшатли одам савдоси фожиаларидан бири деб атади. Одам савдоси бўйича маълум бир жиноий ташкилот шу йўл билан уларни ноқонуний равишда мамлакатга олиб киришга уринган.
Расмийларнинг айтишича, улар барча қурбонларнинг миллатини билишмайди, аммо уларнинг барчаси катталардир.
Қутқарув хизматлари 366 м майдонга сочилиб кетган жасадлари билан иккита ағдарилган қайиқни топди. Қидирув операцияси якшанба куни эрталабгача давом этди.
Қутқарувчилар тирик қолганларни топмаган, бироқ расмийларнинг фикрича, баъзилар фавқулодда хизматлар етиб келгунига қадар пляжни тарк этган бўлиши мумкин.
Сан-Диего АҚШ-Мексика чегарасига яқин жойлашган ва АҚШ ҳукумати муҳожирларни киритмаслик учун шаҳар жанубида қирғоқ бўйида девор қурди.
Воқеа сўнгги беш ой ичида ҳудудда қайд этилган муҳожирларнинг ноқонуний олиб ўтилиши билан боғлиқ юзлаб ҳолатлардан бири бўлган.
2021 йилда Сан-Диего қирғоқларида худди шундай бахтсиз ҳодисада тўрт киши ҳалок бўлди ва ўнлаб киши жароҳат олди.
Фото: REUTERS