Ҳиндистонда аҳоли шаҳар чиқиндихонасидаги ёнғиндан чиққан заҳарли тутун исканжасида қолди
Ёнғин ўтган ҳафта ҳар куни тонналаб чиқиндиларни қайта ишловчи маҳаллий заводда бошланган.
Аҳолига уйда қолиш ва ташқарига чиқсалар N-95 ниқобларини тақиш тавсия этилади. Маҳаллий ҳукумат мактаблар ёш болалар учун ёпилишини ҳам эълон қилди.
Якшанба куни эълон қилинган баёнотда штат ҳукумати ёнғин назорат остида эканлигини ва тез орада ўчирилишини айтди.
Ҳиндистоннинг кўп қисмларида, асосан, чиқиндилар парчаланиши натижасида ҳосил бўлган метан туфайли катта чиқиндихона ёнғинлари тез-тез қайд этилади.
Кочи шаҳри чеккасида жойлашган Браҳмапурам чиқиндиларни қайта ишлаш заводи ўз ҳудудидаги улкан чиқиндилар уюмлари билан машҳур. Завод Кочи шаҳрига тегишли ва бошқарилади.
Расмийларнинг айтишича, йилнинг шу фаслида кучли жазирама туфайли бу ерда ёнғинлар тез-тез содир бўлади. Маҳаллий аҳоли аввалроқ ёнғинлар ва заводда пластмасса ёниши натижасида юзага келган соғлиқ учун хавф-хатарларга қарши норозилик билдирган.
Сўнгги ёнғинга нима сабаб бўлгани ҳозирча аниқ эмас. Ёнғинни ўчиришда қатнашган ўт ўчирувчилардан бирининг Press Trust of India агентлигига айтишича, вайроналар остидаги пластмасса қатламлари қизиб кетган, бу эса ўз навбатида ўчириш жараёнини секинлаштирмоқда.
Ёнғиндан чиққан тутун ҳам ўт ўчирувчиларнинг кўнгил айниши ва бош айланишига сабаб бўлган. Хабар қилинишича, камида 20 нафар ўт ўчирувчи заҳарли тутун таъсирида нафас олишда муаммоларга дуч келган.
Штат соғлиқни сақлаш вазири Вина Жорж кексалар, болалар, ҳомиладор аёллар ва нафас олиш тизими касалликлари бўлган одамларга тутун таъсиридан қочишни маслаҳат берди. Шунингдек, у маъмурият барча шаҳар касалхоналарида нафас олиш касалликлари билан оғриган беморларни даволаш учун чоралар кўрганини қўшимча қилди.
Шаҳар полицияси ёнғин юзасидан тергов бошлади. Ифлосланишни назорат қилиш бўйича давлат қўмитаси маҳаллий ҳокимиятларга чиқиндиларни бошқариш қоидаларига риоя қилмагани учун 18 миллион рупий (220 минг АҚШ доллари) жарима тўлашни сўраб билдиришнома юборди.