Ҳиндистонда 100 йил ичидаги энг иссиқ февраль ойи қайд этилди
Февраль ойида ўртача максимал ҳарорат 29,5 даражани ташкил этди, бу Ҳиндистон ҳароратни қайд эта бошлаганидан бери энг юқори кўрсаткичдир.
Ҳиндистон метеорология департаменти (ҲМД) ҳам мартдан майгача иссиқлик тўлқинларининг «юқори эҳтимоли» бўлишини прогноз қилмоқда.
Узоқ муддатли иссиқлик тўлқини буғдой етиштиришга таъсир қилиши ва электр энергиясига бўлган талабни ошириши мумкин.
«Ҳиндистоннинг шимоли-шарқий, шарқий ва марказий қисмларида, шунингдек, шимоли-ғарбий Ҳиндистоннинг баъзи қисмларида март ва май ойларида ҳарорат меъёрдан анча юқори бўлиши мумкин», - дейилади ҲМД баёнотида.
Иссиқ ёз ва ғайритабиий иссиқлик Ҳиндистонда, айниқса май ва июн ойларига тўғри келади. Аммо ўтган йилгидек, бу йил ҳам ёз эртароқ бошланадиган кўринади – 2022 йил марти Ҳиндистонда 1901 йилдан бери энг иссиқ ой бўлди.
Мутахассислар, шунингдек, Ҳиндистонда жазирама тўлқинлар ҳозирда кучлироқ ва тез-тез бўлиб, узоқроқ давом этишини айтишди.
Ўтган йили Ҳиндистон мавсумий иссиқ об-ҳаво ҳосилга таъсир қилиб, мамлакатда нархларнинг кўтарилишига сабаб бўлганидан кейин буғдой экспортини тақиқлашга мажбур бўлди.
Ҳиндистон буғдой етиштириш бўйича дунёда иккинчи ўринда туради.
Ўтган йили ғайриоддий юқори ҳароратлар ҳам электр энергиясига бўлган талабнинг ошишига олиб келди, натижада кўплаб штатларда электр таъминоти узилиб қолди.
Bloomberg хабарига кўра, жорий йилнинг сўнгги ҳафталарида электр энергиясига бўлган талаб деярли рекорд даражага етди.
Кўпгина мутахассислар, шунингдек, ҳаддан ташқари иссиқликнинг кўпинча иссиқда ташқарида ишлашга мажбур бўлган камбағалларга таъсиридан хавотирда.
«Иссиқлик тўлқинлари саломатлик учун жиддий оқибатларга олиб келиши мумкин. Агар ҳарорат кечаси ҳам юқори бўлса, организмнинг тикланиш имконияти қолмайди, бу эса касаллик ва юқори тиббий тўловлар эҳтимолини оширади», — деди эколог олим доктор Чандни Сингх.
The Lancet тиббий журналида ўтган йили чоп этилган тадқиқотга кўра, Ҳиндистонда 2000-2004 ва 2017-2021 йилларда иссиқлик билан боғлиқ ўлимлар 55 фоизга ошган.
Фото: Getty Images