Хитойда бойлар сони сезиларли даражада камайди

PEKIN. Kazinform - Хитойнинг бойлиги камида 5 миллиард юан (690 миллион доллар) бўлган энг бой одамлар сони рекорд даражада қисқарди. Alibaba асосчиси Джек Ма 9-ўринда. Бу ҳақда Hurun институти (Хужун) томонидан чоп этилган Hurun China Rich List ҳисоботида айтилади, дея хабар беради Kazinform мухбири.

Бу йил рўйхатга 1305 киши кирди, бу ўтган йилга нисбатан 11 фоизга кам, уларнинг умумий бойлиги эса 3,5 триллион долларни ташкил қилди (бу 2021 йилга нисбатан 18 фоизга кам).

Энг бой хитойликлар рўйхатида биринчи ўринни ичимлик ишлаб чиқарувчи компания асосчиси Чжун Шаншан эгаллади. Унинг бойлиги бир йил ичида 17 фоизга ошиб, 65 миллиард долларни ташкил қилган.

Иккинчи ўринда ByteDance асосчиси Чжан Имин турибди, унинг бойлиги 35 миллиард доллар.

CATL ёнилғи унсурлари ва литий-ионли аккумуляторлар ишлаб чиқарувчи Цзэн Юйкунь 32,9 миллиард доллар бойлиги билан кучли учликни якунлаб турибди.

Alibaba асосчиси Джек Ма атиги тўққизинчи ўринни эгаллади. Унинг бойлиги тахминан 30 фоизга камайиб, 25,7 миллиард долларни ташкил қилган.

Энг бой одамларга эга шаҳарлар учлигига Пекин, Шэньчжэнь ва Шанхай киради, кейинги ўринларда Гонконг ва Ханчжоу жойлашган.

Хитойлик миллиардерларнинг ўртача ёши 58 ёш.

Нашр таъкидлаганидек, Хитойнинг энг бой одамлари рўйхатининг қисқаришига глобал пандемия ва геосиёсий кескинлик шароитида жаҳон иқтисодиётининг секинлашиши таъсир кўрсатди.

Муаллиф: Руслан Сулейменов

Фото: english.www.gov.cn