Хитойда 900 йил аввал қурилган энг узун ёғоч кўприк ёниб кетди

NUR-SULTAN. Kazinform – 900 йилдан кўпроқ вақт олдин қурилган Хитойдаги энг узун кўприк – Ваньань ёниб кетди ва бутунлай вайрон бўлди, деб хабар беради Kazinform Еuronewsга таяниб.

Қадимий кўприк Фуцзянь провинциясининг Пиннань округида жойлашган.

Ёнғин шанба куни кечқурун бошланган. Ҳозиргача ёнғин тўлиқ ўчирилган, ҳодиса натижасида қурбонлар йўқ.

Ёнғин сабаблари аниқланмоқда. Кўприкнинг умумий узунлиги 98,2 метр, кенглиги 4,7 метрни ташкил қилади.

У Сун сулоласи ҳукмронлиги даврида (960-1279) қурилган. Кўприкда олдин - 1742 йилда ёнғин содир бўлган. Кейинчалик у таъмирланди. 2006 йилда кўприк давлат даражасида қўриқланадиган объектлар рўйхатига киритилган. Бу Хитойдаги энг узун ёғоч кўприк ҳисобланган.