Хитой супермаркетларида Қозоғистон маҳсулотлари бурчаги очилади

XIAN. Кazinform – Қозоғистоннинг Хитойнинг Сиань шаҳрида бўлиб ўтган савдо-иқтисодий миссияси доирасида KazakhExport миллий экспорт суғурта компанияси ва Wuhan Asia Europe Logistics Co халқаро логистика компанияси ҳамкорлик тўғрисидаги меморандумни имзолади, деб хабар беради Кazinform KazakhExport матбуот хизматига таяниб.

Томонлар Қозоғистон маҳсулотларини Хитой бозорида илгари суриш бўйича тадбирларни биргаликда ташкил этишга келишиб олдилар.

«Стратегик ҳужжат Қозоғистон ва Хитой компаниялари ўртасидаги ҳамкорликдаги иш самарадорлигини ошириш, яқин тижорат алоқаларини ривожлантириш ва Қозоғистоннинг тайёр маҳсулотини Хитойга хомашёсиз экспорт қилиш ҳажмини оширишга қаратилган», — деди ХХРдаги KazakhExport ҳудудий директори Сергей Салманов.

Меморандумга кўра, «Ухань Ханьоу» Қозоғистон маҳсулотларини импорт қилади ва тематик бўлимлар орқали Хубэй провинцияси ва Хитойнинг савдо тармоқларида қозоқ миллий услубидаги ихтисослаштирилган стендлар ўрнатади. Компания Қозоғистон товарлари ва KazakhExport имкониятларини мамлакат ҳудудида илгари суришни қўллаб-қувватлайди.

Қозоғистон миллий экспорт суғурта компанияси маҳаллий ишлаб чиқарувчилар билан алоқалар ўрнатиш ва импорт қилувчиларни қизиқтирган маҳсулотларни излашда ёрдам беради. Шунингдек, у қозоғистонлик экспортчилар учун зарур суғурта ва молиялаштиришни таъминлайди.

Томонлар Қозоғистон товарлари маҳаллий истеъмолчилар орасида юқори талабга эга бўлишига ишонч билдирди. ХХРга ёғ, макарон, қандолат маҳсулотлари, ичимликлар ва бошқа товарлар етказиб бериш бўйича келишувга эришилди.

Йил бошидан буён 53 миллиард тенгелик экспорт шартномалари тасдиқланди. Ун ва кунгабоқар уруғи етказиб бериш бўйича 11 Хитой импортёри билан 17 та шартнома имзоланди.

Эслатиб ўтамиз, 2019 йилда KazakhExport ва Wuhan Asia Europe Logistics Co ўртасидаги ҳамкорлик доирасида Ухань шаҳрида қозоқ миллий услубида безатилган биринчи тематик бўлим очилган эди. Аммо пандемия сабабли ҳамкорлик тўхтатилди.

«Ухань Ханьоу» - Han Xin Ou халқаро йўналиш поездлари учун ХХР давлат темир йўл юк платформаси. Хубэй провинциясининг ўнлаб шаҳарларида замонавий универсал дўконлар, савдо марказлари ва супермаркетлар мавжуд. Шунингдек, импорт, транспорт логистикаси ва кенг тарқатиш тармоғи йўлга қўйилди. Компания Ухань ҳукумати томонидан субсидияланади ва «Бир камар ва бир йўл» ташаббуси аъзоси ҳисобланади.