Хитой Ой, Марс ва бошқа сайёраларга учмоқчи

NUR-SULTAN. Kazinform – 2030 йилга бориб Хитой Ойга, Марс ва Юпитерга ўзининг илк астронавтларини жўнатади, дея хабар беради Kazinform BBC Newsга таяниб.

Хитой Миллий космик бошқармаси 2003 йилда ташкил этилган бўлиб, йиллик бюджети 300 миллион долларни ташкил қилади.

2016 йилда Хитой ўзининг космик саноатини хусусий компанияларга очди ва энди улар йилига 1,5 миллиард доллардан ортиқ сармоя киритмоқда.

Айни пайтда Хитойнинг космик лойиҳаларида 300 мингга яқин киши ишлайди, бу АҚШнинг NASA космик агентлигидан 18 баробар кўпдир.

Натижада 2021 йилда Пекин ўзининг Тяньгун космик станциясининг биринчи модулини орбитага чиқарди.

Шу йил охиригача унга «Mengtian science lab» илмий лабораториясининг қўшимча модули, келгуси йилда эса «Xuntian» космик телескопини қўшиш режалаштирилган.

Келажакда Тяньгун ўзининг электр станциясига, двигател блокига, ҳаётни таъминлаш тизимларига ва уй-жойга эга бўлади.

Уч нафар хитойлик астронавт мамлакатнинг янги космик станциясида ишлаш учун олти ойлик миссияга киришди.

Бу Хитойнинг етакчи космик давлатга айланиш йўлидаги сўнгги қадами сифатида кўрилмоқда.

Қизиғи шундаки, хитойлик астронавтларнинг ХКСга киришига рухсат берилмаган, чунки АҚШ қонунчилиги NASAнинг Хитой билан маълумот алмашишини тақиқлайди.

Буюк Британиянинг Портсмут университетининг космик лойиҳалар раҳбари Люсинда Кингнинг фикрича, Хитойнинг Ойга парвози қисман унинг юзасидан ноёб металларни ажратиб олиш имконияти билан боғлиқ.

Лондон космик сиёсат ва ҳуқуқ институти директори профессор Саид Мустешарнинг фикрича, Хитойнинг космик дастури бутун дунёга ўз кучи ва технологик тараққиётини кўрсатиш истагини намойиш этади.