Гуманитар ёрдам: 25 минг доза QazVac вакцинаси Қирғизистонга етказиб берилди
Уни топшириш маросими Бишкекда Қирғизистон Соғлиқни сақлаш вазири Алимкадир Бейшеналиев, Қозоғистон элчиси Рапил Жошибаев ва тиббиёт ташкилотлари вакиллари иштирокида бўлиб ўтди.
Вазир А.Бейшеналиев Қозоғистон томонига коронавирус инфекциясининг мамлакатда келгусида тарқалишига қарши турадиган муҳим ёрдам учун самимий миннатдорлик билдирди. «Биз AstraZenesa, Спутник V ва бошқа хорижий вакциналар билан бир қаторда қирғизистонликлар коронавирус инфектсиясига қарши QazVac вакцинаси билан эмлашни муваффақиятли амалга ошира олишидан хурсандмиз», - деди у. Унга кўра, Қозоғистон вакцинаси тезда аҳолининг эмлаш пунктларига тарқатилади ва фуқароларнинг коронавирус юқтириш хавфини камайтириш бўйича республика тиббиёт тизимининг имкониятларини кенгайтиради.
Ўз навбатида, Р. Жошибаев Қозоғистон вакцинасини етказиб бериш Қозоғистон Республикаси Ҳукумати томонидан Қозоғистон Президенти Қасим-Жомарт Тоқаевнинг Қирғизистон Президенти Садир Жапаров билан музокаралари натижалари бўйича кўрсатмаларига мувофиқ ташкил этилганлигини таъкидлади.
«Қирғизистон бизнинг дўстларимиз ва халқаро ҳамкорларимиз орасида биринчи бўлиб коронавирусга қарши Қозоғистон вакцинасини қабул қилди, бу мамлакатларимиз ўртасидаги дўстлик ва яхши қўшничилик алоқаларини яна бир бор тасдиқлайди», - дея таъкидлади қозоғистонлик дипломат. Шунингдек, у Қозоғистондан келаётган гуманитар ёрдам кўплаб одамларнинг ҳаётини сақлаб қолиши ва Қирғизистондаги санитария-эпидемиологик вазиятни яхшилашга ёрдам беришига ишонч билдирди.
QazVac вакцинаси Қозоғистон Таълим ва фан вазирлигининг Биологик хавфсизлик муаммолари илмий-тадқиқот институти томонидан ишлаб чиқилган ва 2021 йил бошидан бошлаб Россия ва Хитой мутахассислари томонидан ишлаб чиқарилган вакциналар билан бирга қозоғистонликларга эмлаш учун кенг қўлланилган. Клиник тадқиқотлар ва уни Қозоғистонда кенг қўллаш амалиёти QazVac вакцинасининг хавфсизлигини ва коронавирус инфекцияси ҳамда унинг оғир шаклларини юқтиришнинг олдини олишда юқори самарадорлигини (90% дан юқори) кўрсатди. QazVac вакцинаси билан эмлаш 18 ёшдан катта ёшдагиларга тавсия этилади ва мушак ичига икки босқичда юборилади, уларнинг орасидаги интервал 21 кунни ташкил қилади. Қозоғистон вакцинаси ишлаб чиқувчилари ЖССТда рўйхатдан ўтказиш жараёнини бошладилар.