Грузиядаги оммавий намойишлар чоғида қўлга олинганларнинг барчаси озод қилинди

ТBILISI. Kazinform – Грузия Ички ишлар вазирлиги мамлакатда 7-8 март кунлари бўлиб ўтган намойишлар чоғида қўлга олинганларнинг барчаси озод қилинганини маълум қилди, дея хабар беради Kazinform Новости-Грузия сайтига таяниб.

Грузияда бўлиб ўтган намойишлар чоғида 7-8 март кунлари 130 дан ортиқ одам ҳуқуқ-тартибот органларига қаршилик кўрсатганликда айбланиб, ҳибсга олинган.

Эслатиб ўтамиз, Тбилиси марказида ҳафта бошида Грузия парламенти биринчи ўқишда маъқуллаган «хорижий агентлар» ҳақидаги қонун туфайли бошланган норозилик акцияси кучайиб, икки кун давом этди.

Ўшанда «Грузин орзуси – демократик Грузия» ҳукмрон партияси оммавий норозилик намойишларидан сўнг Грузия парламентидан чет эл агентлари ҳақидаги қонун лойиҳасини қайтариб олишга қарор қилган.