Германияда CОVID-19 га қарши кураш чоралари кучайтирилади

2 Октябрь, 12:17
Германияда CОVID-19 га қарши кураш чоралари кучайтирилади

BRUSSELS. Кazinform - Европанинг аксарият давлатларида CОVID-19 билан касалланиш даражаси ошиб бормоқда. Коронавируснинг мумкин бўлган кузги тўлқини олдидан Германия яна аҳолини айрим ҳолларда FFP2 ниқобларини кийишга мажбур қилмоқда, деб хабар беради Кazinform мухбири.

Мамлакатда совуқ об-ҳаво бошланиши билан инфекциялар барқарор ўсиб бораётгани сабабли санитария қоидалари қайта тикланмоқда. Жума куни 96,367 та янги COVID-19 ҳолати қайд этилди, бу бир ҳафта олдин қайд этилган сондан деярли икки баравар кўп.

Германия соғлиқни сақлаш вазири Карл Лаутербах 1 октябрдан кейин киритилган янги қоидаларни Европанинг бошқа давлатларига қараганда қаттиқроқ деб атади, бироқ «Германия пандемияга қарши курашда «ақллироқ эмас, балки эҳтиёткорроқ» эканини таъкидлади.

Шанба кунидан бошлаб шаҳарлараро поездларда 14 ёшдан ошган йўловчилар шу пайтгача мажбурий бўлган жарроҳлик ниқоблари ўрнига FFP2 ниқобларини кийишлари керак бўлади.

Германиянинг барча 16 штатлари соғлиқни сақлаш вазирлари маҳаллий автобуслар ва поездлардаги йўловчилар ҳеч бўлмаганда жарроҳлик ниқобларини кийишлари кераклигига келишиб олдилар, гарчи бу янги федерал қоидаларга мувофиқ мажбурий эмас.

Бошқа томондан, ҳаво йўловчилари ҳозирча ниқобсиз ҳаракат қилишлари мумкин, бу бошқа мамлакатлар ва Европа Иттифоқи авиакомпанияларининг амалиётига мос келади.

Энди FFP2 ниқобларини Германия касалхоналари, қариялар уйлари ва шифокорлар кабинетларида ҳам кийиш талаб этилади. Қариялар уйлари ёки шифохоналарга ташриф буюришдан олдин, манфий коронавирус тестини топшириш керак ва ушбу муассасалар ходимлари ҳафтада бир неча марта тестдан ўтишлари керак.

Агар CОVID-19 билан боғлиқ вазият ёмонлашса, федерал штатлар дўконлар ва ресторанлар каби ёпиқ жойларда ниқоб кийишни талаб қилиш каби қўшимча чораларни киритиш ҳуқуқига эга. Синовлар мактаблар ва болалар боғчаларида ҳам мажбурий бўлиши мумкин.

Умумтаълим мактабларида Германиянинг минтақавий маъмурияти ҳам мажбурий ниқоб кийишни қайта жорий қилиши мумкин, лекин фақат 11 ёшдан ошган болалар учун.

Бироқ, кексалар ва доимий ғамхўрликка муҳтожлар вакили бўлган немис ташкилотлари янги қоидаларни танқид қилиб, улар «ҳаддан ошиб кетяпти», дея танқид қилди. Улар қариялар уйи аҳолиси ўз хоналаридан ташқарида бўлганларида FFP2 ниқобларини кийишларини ҳаддан ташқари ортиқча деб ҳисоблашади.

Мисол учун, Германиянинг BAGSО кексалар ассоциациясининг таъкидлашича, бошқа аҳоли гуруҳлари тўрт марта эмланган бўлса, уйда ниқоб тақмаслиги керак. Шундай қилиб, янги қоидалар қариялар уйи аҳолисининг ижтимоий ва жисмоний алоқага бўлган эҳтиёжларини эътиборсиз қолдиради.

Муаллиф: Арнур Раҳимбеков

Янгиликлар