Гаджетлар болаларнинг психологик ривожланишига таъсир қилади

PETROPAVL. Kazinform – Шимолий Қозоғистон вилояти санитар шифокорлари болаларнинг гаджетлардан кўп фойдаланиши уларнинг соғлиғига салбий таъсир кўрсатиши ҳақида огоҳлантирди, деб хабар беради Kazinform мухбири.

Шимолий Қозоғистон вилояти санитария-эпидемиология назорати бошқармаси бош мутахассиси Аминат Байматованинг сўзларига кўра, аксарият ота-оналар гаджетлар болалар ривожланишига салбий таъсир кўрсатишини билишади, лекин уларнинг мобил телефон ва компьютерлардан фойдаланишини чекламайдилар. Натижада сўнгги пайтларда болалар ўртасида кўз касалликлари кўпайган.

«Болалар қизиқарли нарсаларни тезда ўрганишади. Олимларнинг таъкидлашича, болалар кунига 30 дақиқа планшетдан, смартфонлардан эса кунига икки соатдан кўп фойдаланмаслиги керак. Ўсмирларга гаджетлардан фойдаланишга рухсат берилади, лекин фақат мактаб вазифалари учун.

Умуман олганда, болани эрта ёшда компьютер ёки телевизор олдига қўймаслик яхшироқдир. Чунки гаджетлардан фойдаланиш боланинг жисмоний ва руҳий ривожланишига таъсир қилади», - дейди Аминат Байматова.

Мутахассиснинг сўзларига кўра, боланинг ўйин давомида олган мукофоти унга қувонч бахш этади. Натижада компьютерга қарамлик кучаяди. Агар бола фақат электрон қурилмаларга қизиқса, бу унинг ижодий салоҳиятини, жисмоний фаоллигини пасайтиради.

«Жисмоний фаолликнинг камлиги, кўп ўтириш унинг физиологиясига салбий таъсир кўрсатиши билан бирга, боланинг асаб тизимини ҳам бузади. Ухлаш вақтида мультфильм кўриш ҳам боланинг соғлиғига зарар келтиради, ухлашдан икки соат олдин мультфильм кўрмаган маъқул, чунки у ухлашни хоҳламайди ва ётишга қийналади. Бу боланинг асаб тизимига таъсир қилади», - деди фельдшер.

Аминат Байматова ота-оналарга фарзандлари билан тез-тез тоза ҳавода сайр қилишни, ҳаракатланувчи ўйинлар кўпроқ ўйнашни маслаҳат беради. Бундан ташқари, компьютерингизда ота-она назоратини ўрнатишингиз керак. Иккинчидан, қурилмаларнинг ишлаш вақтини ўлчаш керак. Учинчидан, гаджетлардан фойдаланиш пайтида ва ундан кейин боланинг хатти-ҳаракатларини кузатиш керак. Агар у асабийлашса ёки бош оғриғидан шикоят қилса, гаджетлардан фойдаланишни камайтириш керак. Гаджетлар боланинг ҳаётида юриш, севимли машғулотлари, спорт каби оддий нарсаларни алмаштирмаслиги керак.

Муаллиф: Ақерке Дауренбекқизи