Фермерларга субсидиялар ажратиш тизими такомиллаштирилади – ҚР Бош вазири
«Агросаноат мажмуасини ривожлантириш бўйича умумий қиймати 536 миллиард тенге бўлган 300 га яқин лойиҳа амалга оширилмоқда, бу эса 7 мингга яқин иш ўрни яратиш имконини беради. Қолаверса, субсидиялаш тизими ҳам такомиллаштирилмоқда», — деди А. Смаилов.
Бош вазир, шунингдек, жорий йилги баҳорги экиш ва ҳосил йиғим-терими учун имтиёзли кредит миқдори 140 миллиард тенгега ошганини маълум қилди. 419 минг тонна дизель ёқилғиси деҳқонларга арзонлаштирилган нархларда тарқатилди.
«Бундан ташқари, йиғим-терим учун 400 минг тонна арзонлаштирилган дизель ёқилғиси ҳам кўриб чиқилди. Қишлоқ хўжалиги техникаси учун имтиёзли кредитлар 145 миллиард тенгега ошди», - деди у.
Унга кўра, Давлат раҳбари топшириғига мувофиқ қишлоқда ижтимоий, муҳандислик ва транспорт инфратузилмасини модернизация қилишга қаратилган Қишлоқларни ривожлантиришнинг янги концепцияси қабул қилинди.
Ҳукумат раҳбарининг сўзларига кўра, жорий йилда қишлоқ аҳолисининг микрокредитлар бериш орқали даромадларини ошириш ва қишлоқ хўжалиги кооперациясини ривожлантириш бўйича «Қишлоқ депозити» лойиҳасини амалга ошириш бошланди. Бунинг учун жорий йилда 100 миллиард тенге ажратилди. 7 йил ичида 1 миллиондан ортиқ қишлоқ аҳолиси лойиҳа билан қамраб олинади. Бунинг учун жами 1 триллион тенге ажратилади.
Шу билан бирга, Алихан Смаилов «Ауыл – ел бесігі»(Қишлоқ – мамлакат бешиги) дастури қишлоқ тараққиётининг асосий механизмларидан бири бўлиб қолаётганини алоҳида таъкидлади. Жорий йилда дастур доирасида 900 та қишлоқда умумий қиймати 198 миллиард тенге бўлган 1800 дан ортиқ лойиҳани амалга ошириш режалаштирилган. Шунингдек, чегара ҳудудлари инфратузилмасини ривожлантириш чоралари кўрилди. 2023 йилда 140 та қишлоқда 290 та объект фойдаланишга топширилади.
Муаллиф: Руслан Ғаббасов