Фаластин ва Исроил ўртасида ўт очишни тўхтатиш келишуви кучга кирди

GAZA. Kazinform - Якшанба куни кечаси Исроил ва Фаластин ўртасидаги ўт очишни тўхтатиш келишуви кучга кирди, дея хабар бермоқда Kazinform USA Today нашрига таяниб.

Исроил самолётлари жума кунидан бери Ғазодаги нишонларни нишонга олди ва Эрон томонидан қўллаб-қувватланган Фаластин Исломий Жиҳод қуролли гуруҳи бунга жавобан Исроилга юзлаб ракета отди. Трансчегаравий жангларнинг кенг кўламли урушга айланиб кетиши хавфи Миср воситачилигида тинчлик келишувларига эришилгунга қадар сақланиб қолди.

Ғазодаги ХАМАС ҳукмрон гуруҳи можародан четда қолмоқда. Бунга сабаб Исроил билан мавжуд иқтисодий келишувларни бекор қилишни истамаслиги бўлиши мумкин, унга кўра Исроил Ғазо аҳолисига 12 минг иш рухсатномаси берган ва яна 2000 иш квотаси беришни кўриб чиқмоқда.

Бирлашган Миллатлар Ташкилоти Хавфсизлик Кенгаши зўравонликларнинг кучайишини муҳокама қилиш учун душанба куни фавқулодда йиғилиш ўтказишни режалаштирган. Шу ойда Кенгашга раислик қилаётган Хитой БМТ Хавфсизлик Кенгашида араб давлатларидан вакиллик қилувчи БАА илтимосига биноан сессияни белгилади. Исроилнинг ҳисоб-китобларига кўра, ҳаво ҳужумларида 15 га яқин жангари, жумладан, Фаластин Исломий Жиҳоди қўмондонларидан бири Холид Мансур ҳалок бўлган.

Исроил ҳарбийларига кўра, Ғазодаги жангарилар Исроил томон 580 га яқин ракета отган, уларнинг аксарияти ҳаво ҳужумидан мудофаа тизимлари томонидан тутиб олинган, иккитаси Қуддус йўналишида уриб туширилган.

Бу ўтган йили Исроил ва ХАМАС ўртасидаги 11 кунлик урушдан бери Исроил ва Ғазо жангари гуруҳлари ўртасидаги энг шиддатли қарама-қаршилик бўлди.

Фото:usatoday.com