Фахрийлар уюшмаси Қозоғистон президенти сайловига номзод тақдим этди

5 Октябрь, 17:41
Фахрийлар уюшмаси Қозоғистон президенти сайловига номзод тақдим этди

ASTANA. Кazinform – «Фахрийлар уюшмаси» республика жамоат бирлашмаси Қозоғистон Республикаси президентлигига номзод кўрсатди, деб хабар беради Кazinform мухбири.

Таъкидлаш жоизки, пойтахтда «Фахрийлар уюшмаси» республика жамоат бирлашмасининг навбатдан ташқари Х съезди бўлиб ўтмоқда. Съездга мамлакатнинг барча вилоятларидан 100 дан ортиқ делегатлар келди.

«Агар ҳозирги вазиятни геосиёсий вазият билан боғлиқ ҳолда олиб қарайдиган бўлсак, менимча, Президент ваколатини 7 йилга узайтириш тўғри қарор ва дадил қадамдир. Мен ҳам муддатидан олдин сайлов ўтказиш таклифини қўллаб-қувватлайман. Ватанимиз келажаги – фарзандларимиз ва невараларимиз учун юртимиздаги барқарорликдир», — деди съезд очилишида «Фахрийлар уюшмаси» РЖБ Марказий Кенгаши раиси Бақтиқожа Измухамбетов.

Унинг сўзларига кўра, 7 йил Давлат раҳбари томонидан илгари сурилган дастурларни амалга ошириш учун жуда мос давр, Президент ташаббуси билан бошланган ислоҳотларни амалга ошириш учун етарли вақт.

«Қасим-Жомарт Кемелули сайлов ўтказиш таклифи билан мамлакат раҳбари сайловини овозга қўймоқда. Юртимизда билимли, дунёқараши кенг, ватанпарвар фуқаролар кўп. Президентликка номзод бўлишни истаганлар доим топилади. Муаммо ҳокимиятга интилишда эмас, сиёсий вазнда. Бўлажак сайлов нафақат Президент сайлови, балки Қозоғистоннинг халқаро позицияси ва ички сиёсати йўналишини белгилашга қаратилган сиёсий қадам бўлади.

Спикернинг сўзларига кўра, сўнгги пайтларда Давлат раҳбари томонидан қабул қилинган ислоҳотлар кўпчиликка манзур бўлганини сўнгги референдумдаги халқ фаол иштирокидан ҳам кўриш мумкин.

«Ислоҳотлар сари йўл ҳеч қачон осон бўлмаган. Мамлакатимиз янги тарихий даврга қадам қўймоқда. Қасим-Жомарт Кемелули адолатли Қозоғистонни барпо этиш йўлида туб ва кенг қамровли ислоҳотларни муваффақиятли амалга ошириш учун янги ишонч мандати зарурлигини, давлат манфаатларини ҳамма нарсадан устун қўйишини ва навбатдан ташқари президентлик сайловига боришга тайёр эканини айтди. У президентлик мандати муддатини фақат бир муддат — 7 йиллик муддат билан чеклашни, бунда қайта сайланишни тақиқлашни таклиф қилди. Бу келажакда ҳокимиятни эгаллашга уринишларнинг олдини олади. Биз, фахрийлар мамлакатимиз учун муҳим сиёсий кампанияга катта масъулият билан қарашимиз керак. Айни пайтда Президентимиз томонидан илгари сурилаётган ислоҳотларни қўллаб-қувватлаш мамлакатимиз келажаги учун жуда муҳим», — деди Б. Измухамбетов.

Муаллиф: Айжан Серикжанқизи


Янгиликлар