Европа Иттифоқи ўрмон ёнғинлари билан курашиш учун 369 нафар қутқарувчини сафарбар қилмоқда
18 Август 19:43

Европа Иттифоқи ўрмон ёнғинлари билан курашиш учун 369 нафар қутқарувчини сафарбар қилмоқда

BRUSSELS. Кazinform - Еврокомиссия маълумотларига кўра, сўнгги икки ой давомида Европа Иттифоқи фуқаролик ҳимояси механизми доирасида бутун Европа бўйлаб 29 та самолёт ва 8 та вертолёт жойлаштирилди, деб хабар беради Кazinform мухбири.

Европа Иттифоқининг фуқаролик муҳофазаси механизми фуқароларни ҳимоя қилиш учун ресурслардан фойдаланишни мувофиқлаштириш ва Европа Иттифоқи аъзолари томонидан табиий ва техноген офатлардан жабрланган мамлакатларга моддий ёрдам кўрсатишнинг умумий тизимидир.

Аъзо давлатлар ўрмон ёнғинларига қарши курашда ёрдам сўраш учун Европа Иттифоқи фуқаролик ҳимояси механизмини фаоллаштириши мумкин.

Европа Иттифоқининг айрим давлатларида ёнғинларга қарши кураш доирасида фуқаро муҳофазаси механизмига 369 нафар ўт ўчирувчи ва 105 дан ортиқ техника жалб қилинган.

«Бизни Европада қийин ёз кутмоқда. Бу йил 700 минг гектардан ортиқ майдон ёнди, бу 2006 йилдан бери энг юқори кўрсаткичдир. Биз Брюсселдаги Фавқулодда вазиятларда ҳаракатни мувофиқлаштириш марказимиз орқали кечаю-кундуз вазиятни кузатишда давом этамиз ва зарур ёрдамни сафарбар қиламиз», - деди Инқирозларни бошқариш бўйича Европа комиссари Янез Ленарчич.

Ҳозиргача Европа Иттифоқи фуқаролик ҳимояси механизми тўққиз марта бешта давлат томонидан фаоллаштирилди, бунда Европа Иттифоқига аъзо давлатлар мисли кўрилмаган даражада бирдамлик кўрсатди.

Бундан ташқари, Европа Иттифоқининг сунъий йўлдош хариталаш хизмати Copernicus 15 давлатдаги ўрмон ёнғинлари туфайли 46 марта фаоллаштирилган, июл ва август ойларида маҳаллий ўт ўчирувчиларни қўллаб-қувватлаш учун Болгария, Руминия, Германия, Франция, Финляндия ва Норвегиядан 150 га яқин ўт ўчирувчи Грецияга юборилган.

Фото: www.dw.cоm

Муаллиф: Арнур Раҳимбеков

Янгиликлар

Архив