Европа Иттифоқи Хорватиянинг Шенген зонасига киришини қўллаб-қувватлади
Европа Иттифоқи адлия ва ички ишлар вазирлари кенгаши йиғилиши якунлари бўйича Шенген қонунчилигини Хорватияга тўлиқ татбиқ этишга қарор қилинди.
«Чехиянинг Европа Иттифоқига раислиги даврида Хорватия Европа интеграциясида иккита муҳим қадам ташлаганидан хурсандман. У евро ва Шенген ҳудудига қўшилди. Ишончим комилки, бу муваффақият бошқа аъзо мамлакатларга ҳам йўл очади. Биз ҳамкасбларимиз билан биргаликда Болгария ва Руминияни яқин келажакда Шенген ҳудудига киритиш учун қўлимиздан келганини қиламиз», — деди Чехия Республикаси ички ишлар вазири Вит Ракусан.
Ички ишлар вазирлари, шунингдек, Шенген ҳудудининг умумий аҳволини муҳокама қилиб, ички хавфсизлик чораларига, жумладан, ахборот технологиялари тизимларининг мувофиқлиги ва мигрантларнинг ноқонуний кириб келишига қарши курашга урғу беришди.
Европа ОАВларининг ёзишича, Хорватияни Шенген зонасига қабул қилишдан ташқари, вазирлар Болгария ва Руминиянинг визасиз киришини ҳам кўриб чиқиши керак. Бунга Европа Иттифоқининг бошқа аъзолари – Австрия ва Нидерландия қарши чиқди.
«Австрия Хорватияни қўллаб-қувватлашини аниқ билдирди, бироқ 2007 йилда Европа Иттифоқига қўшилган Болгария ва Руминияга қарши. Нидерландияликлар Руминияни қабул қилган тақдирда ҳам, улар Болгарияга қарши», - деб ёзади EUaktiv.
Австрия ва Нидерландиянинг фикрича, Болгария ва Руминия чегара назорати тизимлари Европага ноқонуний муҳожирларни киритиш учун жуда заиф.
Эслатиб ўтамиз, 2023 йил 1 январдан Хорватия Шенген ҳудудига қўшилади.
Фото: аа.cоm.tr
Муаллиф: Арнур Раҳимбеков